Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
Bulle se RG dalk ook na Japan gelok
Andries los Leeus vir rugby in Japan

Andries Coetzee en RG Snyman tel onder die Springbokke wat volgende jaar saam met Duane Vermeulen en Willie le Roux klubrugby in Japan kan speel.

Die lys sal gou langer word met ander plaaslike Superrugby-spelers wat soos Snyman en Coetzee Japan as ’n opsie beskou.

Die Leeu-heelagter Andries Coetzee. FOTO: DEON RAATH

Coetzee se naam word al van verlede jaar af met ’n skuif na Japan verbind. Allister Coetzee se Canon Eagles is een van die klubs wat hom wou hê. Dit is onwaarskynlik dat hy nou na Canon Eagles sal gaan, met ander klubs wat belangstelling in hom toon.

Nadat hy in 2017 die Bokke se eerstekeuse-heelagter was, het Coetzee in onguns verval op nasionale vlak. Op 28-jarige ouderdom maak sy beplande skuif na Japan sin, hoewel dit ’n yslike slag vir die Leeus is.

Die 24-jarige Snyman speel al van 2017 af vir die Japanse klubspan Honda Heat.

Hy is gelukkig daar en behoort in 2020 daarheen terug te keer. Die Engelse koerant The Rugby Paper het onlangs berig Harlequins stel in hom belang, maar dié klub is nie deel van sy toekomsplanne nie. Leicester Tigers se naam is ook al genoem as ’n klub wat hom oorweeg het.

Die dilemma waarmee die Bulle en die Leeus egter sit, is dat hul Japanse klubspelers nie volgende jaar vir Superrugby beskikbaar is nie.

Dit was tot nou vir Suid-Afrikaanse spelers nog moontlik om tydens die Curriebekerreeks in Japan te speel en betyds vir Superrugby terug te keer

RG Snyman

Weens die Wêreldbekertoernooi is vanjaar se Japanse Topliga tot Januarie 2020 uitgestel. Dit duur tot Mei volgende jaar, wat beteken Japanse spelers sal die Superreeks misloop. Dít kan ook die geval in 2021 wees.

Die Bulle, Haaie en Leeus sal daarom groot belangstelling hê of spelers soos Jason Jenkins, Jannes Kirsten (albei Toyota Verblitz), Burger Odendaal (Kubota Spears), André Esterhuizen (Munakata Sanix Blues), Philip van der Walt (Canon Eagles), Ruan Combrinck (Kintetsu Liners), Lourens Erasmus (NTT Docomo Red Hurricanes) en Kwagga Smith (Yamaha Júbilo) volgende jaar na hul Japanse klubspanne terugkeer.

Selfs die Stormers sal duidelikheid by Siya Kolisi wil hê of hy slegs ’n sakebesoek by Panasonic Wild Knights afgelê het, en of hy planne het om volgende jaar vir hulle te speel.

Vermeulen-hulle het reeds vroeër hul Japanse planne bevestig.

Vermeulen het al vroeg in 2018 besluit hy gaan volgende jaar na Frans Ludeke se klubspan Kubota Spears terugkeer. Hy het die afgelope seisoen die eerste keer vir hulle gespeel.

Le Roux se kontrak verstryk vanjaar ná die Engelse Premierliga by Wasps, waarna hy ná die Wêreldbeker by Jake White se Toyota Verblitz sal agterbly.

Meer oor:  Springbokke  |  Rg Snyman  |  Andries Coetzee  |  Duane Vermeulen  |  Willie Le Roux  |  Japan  |  Klubrugby  |  Oorsee
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.