Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
Crusaders-golf verswelg Leeus in Christchurch

Jy kan nie teen donderweer hoes nie.

Dit het die Leeus se rugbyspan Vrydag tot hul spyt uitgevind in die Super-nederlaag met 36-10 teen die Crusaders in Christchurch.

Die Crusaders se kragtige vleuel Sevu Reece Vrydag op pad doellyn toe teen die Leeus. Foto: Getty Images

Selfs ’n moedige vertoning in die eerste helfte was nie goed genoeg om sake vir hulle te red nie, en in die tweede helfte was die oormag net té erg en kon die Crusaders baljaar en die damwal laat bars.

Sommer al binne die eerste vyf minute het die Crusaders gaan druk met die senter Braydon Ennor wat deurgesny het in die middelveld.

Dit wou toe lyk asof die rekenaars nader getrek moes word om by te bly, maar die Leeus het hul verdediging opgeknap en met groot toewyding gespeel.

Hulle het algaande in die wedstryd gekom en meer van die bal gesien.

Die Crusaders is egter ’n span wat druk soos ’n spons absorbeer en wanneer hulle weer daardie een kans kry, dit benut.

Richie Mo’unga, losskakel van die Crusaders, soek ’n gaping teen die Leeus in dié spanne se Superrugby-stryd in Christchurch. Foto: Getty Images

In die laaste klompie minute voor rustyd het die sterk vleuel Sevu Reece eers vir Kwagga Smith soos ’n vrot vel afgestamp en toe nog ’n paar duikslae ontglip om oor te gaan.

Die gaping wat daar met die omdraaislag was (17-3), het nie eintlik reg laat geskied aan die Leeus se dapper vertoning nie.

Binne die eerste tien minute ná rustyd het die tuisspan sy voorsprong vergroot en daarmee die Leeus se weerstand geknak.

Die vleuel George Bridge se aptyt vir drieë is bevredig toe hy afgerond het en vanaf die afskop het hy dit weer gedoen ná ’n langafstand-poging.

Skielik het die Leeus se koppe gehang.

Daar was darem iets vir hulle om opgewonde oor te raak, toe Ruan Combrinck onderskep en die helfte van die veld genael het om die Leeus se enigste drie te laat verskyn.

Tog het die rooi golf van die negemalige Superkampioen hulle verswelg en die tuisspan het na hartelus begin nael en gapings gevind.

Met hierdie sege behou die Crusaders hul onoorwonne rekord teen Leeus in Christchurch en die Johannesburgers krap nog steeds kop oor wat hulle te doen staan om sukses daar te behaal.

* Puntemakers:

Crusaders 36 (17): Drieë: Braydon Ennor, Sevu Reece (2), George Bridge (2). Doelskoppe: Richie Mo’unga (4). Strafdoel: Mo’unga.

Leeus 10 (3): Drie: Ruan Combrinck. Doelskop: Elton Jantjies. Strafdoel: Jantjies.

Superrugby-bepalings

Superrugby-puntelyste

Superrugby-uitslae

Meer oor:  Leeus  |  Crusaders  |  Superrugby
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.