Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
Geen top-poste vir Div en Treu, hoor spelers

Die Westelike Provinsie Rugbyunie (WPRU) beplan nie om vir Gert Smal as sy direkteur van rugby te vervang nie en nóg Peter de Villiers, nóg Paul Treu word oorweeg om die Stormers in aanstaande jaar se Superrugby-reeks af te rig.

Gert Smal. Foto: Gallo Images

Dís glo terugvoer wat die unie se senior spelers van die spelersliggaam Myplayers ontvang het in die nadraai van verlede week se vergadering met Kaapse rugbybase.

Myplayers se besturende direkteur, Eugene Henning, wou egter nie die kommunikasie met spelers bevestig of kommentaar lewer nie.

Spelers het indringend antwoorde oor toekomstige strukture gesoek ná berig is dat die WP se amateur-administrateurs vir Smal met Treu wil vervang én wil hê dat De Villiers, ’n voormalige Springbok-afrigter en tans breier van Zimbabwe, die span vorentoe moet afrig.

Smal se kontrak as direkteur van rugby verstryk later vanjaar, maar die gerugte loop dat dit ’n uitgemaakte saak is dat hy hom reeds voor dan by Toyota Verblitz in Japan gaan aansluit. Jake White is dié span se hoofafrigter.

Hy wou by navraag nie kommentaar lewer hieroor nie.

Peter de Villiers. Foto: Gallo Images

Sou hy wel die unie verlaat, sal dit ’n regstreekse gevolg wees van die magstryd wat die afgelope klompie weke tussen die WP se amateur-raad en sakevleuel gewoed het.

Etlike spelers gaan waarskynlik ook later vanjaar ander weivelde gaan soek, maar hoofsaaklik omdat die meeste Springbokke se kontrakte ná die Wêreldbeker-toernooi verstryk.

Die WP gaan egter ook ander seniors verloor. Die gerugte loop reeds sterk dat die veelsydige agterspeler Dillyn Leyds hom later vanjaar by die Engelse klub Wasps gaan aansluit. Wasps is in die mark vir ’n heelagter omdat hul paaie met dié van die Springbok-heelagter Willie le Roux gaan skei.

Met dié dat Smal verantwoordelik is vir die kontraktering van spelers, sal die WP in ’n delikate posisie wees indien hy binnekort sy bande met die unie verbreek.

Paul Treu. Foto: Gallo Images

Inteendeel, dit kan ’n groot krisis ontketen met sy intellektuele kapitaal wat dalk deur die loop van die Stormers se Superrugby-veldtog verlore kan wees.

Daar heers vir eers ’n skietstilstand in die unie nadat die amateur-raad hom teen ekonomiese realiteite vasgeloop het. Sou die sakevleuel sy mag verloor het, of selfs deur die amateur-raad ontbondel is, sou borgskappe, spelers se kontrakte en selfs die lisensie vir die unie se Superrugby-franchise in die gedrang gewees het.

Al daardie regte is gesetel in die sakevleuel, waarvan die direksie meestal gefrustreerd is met verkose amptenare wat op hul tone wil trap. Die unie is egter die alleen-aandeelhouer in die sakevleuel, wat die amateur-raad aansienlik bemagtig.

Meer oor:  Stormers  |  Paul Treu  |  Gert Smal  |  Wp Rugbyunie  |  Peter De Villiers
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.