Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
Leeus-rolmaal spook steeds by Pote

Die Leeus is dalk sonder ’n paar groot maanhare in hul agttal, maar in die Bulle-kamp word die span anderkant die Jukskei steeds as die voorste Superrugby-franchise in Suid-Afrika gereken.

Handré Pollard (regs) sal Saterdag die Bulle op Ellispark lei teen die Leeus, terwyl Duane Vermeulen (middel) beheer sal neem in die agttal. Foto: Gallo Images

Daarom sal die Bulle nie Saterdag die fout begaan om by Ellispark aan te kom met die veronderstelling dat hulle teen ’n verswakte tuisspan speel nie, verseker Pote Human, die Pretorianers se breier.

Dit is veral in die pak waar die Leeus vanjaar moet wys die vertrek van ysters soos Franco Mostert en Jaco Kriel is nie die einde van die wêreld nie.

Met die Leeus se inspirerende kaptein, Warren Whiteley, ook afwesig, kan die agttal mos nie meer die span se troefkaart wees nie?

Human stem nie saam nie.

“Dit gaan ’n storie wees teen hulle by die afbreekpunte met Malcolm Marx, Marnus Schoeman en Kwagga Smith, wat almal uitstekend is op die grond.

“Hulle het Saterdag teen die Stormers gewys hul skrum is ook nog net so gedug soos vantevore.

Ons het ook nie vergeet nie dat die Leeus verlede seisoen vier keer gaan druk het met lynstaan-rolmale. Ek het die voorspelers toe afgerig en dit maak steeds seer.
Pote Human

“Ons het ook nie vergeet nie dat die Leeus verlede seisoen vier keer gaan druk het met lynstaan-rolmale. Ek het die voorspelers toe afgerig en dit maak steeds seer.

“Ons berei deeglik voor vir dít wat voorlangs op ons wag.”

Die Bulle het in albei 2018 se ontmoetings met die buurspan slae gekry – 35-49 en 12-38.

Human het twee veranderings aan die span aangebring wat die naweek teen die Jaguares verloor het in Buenos Aires.

Die belowende Zimbabwiër Eli Snyman, wat nog net twee keer in die reeks uitgedraf het, vervang die beseerde slot en kaptein, Lood de Jager.

Dylan Sage dra Saterdag in Ballito die Bulle se nr. 12-trui teen die Haaie. Foto: Gallo Images

De Jager het ’n skouerbesering teen die Jaguares opgedoen en die binnesenter Burger Odendaal het Dinsdag dieselfde teëspoed gehad in ’n oefensessie.

Dylan Sage vervang Odendaal in die middelveld.

Human sê hy sien uit na Sage se vertoning.

“Dylan was puik in die voorseisoen, veral in die losmaker teen die Haaie en hy verdien ’n behoorlike kans. Hy en Burger se sterkpunte verskil en die afwisseling kan tot ons voordeel wees.”

Die Springbok-losskakel Handré Pollard is die nuwe kaptein in De Jager se plek, terwyl Human vir Duane Vermeulen as die onderkaptein aangewys het.

Pollard sê hy sien oudergewoonte uit om sy tweestryd met Elton Jantjies te hervat.

“Ons geniet dit om teen mekaar te speel. Hy is ’n goeie speler en een van die leiers in hul span.

“As ons hom onder druk kan plaas, is ons halfpad daar. Ons het ’n paar planne, maar ons sal moet wag en sien,” sê Pollard.

Bulle se span:
Warrick Gelant, Cornal Hendricks, Jesse Kriel, Dylan Sage, Rosko Specman, Handré Pollard (k), Embrose Papier, Duane Vermeulen, Hanro Liebenberg, Ruan Steenkamp, Eli Snyman, Jason Jenkins, Trevor Nyakane, Schalk Brits, Lizo Gqoboka. PLAASVERVANGERS: Corniel Els, Simphiwe Matanzima, Dayan van der Westhuizen, Jannes Kirsten, Tim Agaba, Ivan van Zyl, Manie Libbok, Divan Rossouw.

Superrugby-bepalings

Superrugby-puntelyste

Superrugby-uitslae

Meer oor:  Pote Human  |  Dylan Sage  |  Pretoria  |  Afrigter  |  Bulle  |  Superrugby  |  Haaie  |  Leeus
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.