Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
Jacques Nienaber loer in by Stormers

Die Stormers het by die Springbokke se verdedigingsafrigter, Jacques Nienaber, kers opgesteek voor hul Superrugby-veldtog begin.

Nienaber, wat na verwagting binnekort as Suid-Afrika se hoofafrigter aangestel gaan word, het Dinsdag ’n draai by die Westelike Provinsie se Sentrum vir Uitnemendheid in Bellville gemaak.

Dis ’n besoek wat die Stormers se verdedigingsafrigter, Norman Laker, verwelkom het.

“Ek werk al sedert 2007 saam met Jacques toe ek by die WP se Rugbyinstituut begin het. Maar ja, ons probeer om so nou as moontlik saam te werk. Ek het ook my eie gedagtes, want Superrugby is ’n bietjie anders as toetsrugby,” sê Laker.

Jacques Nienaber. Foto: Gallo Images

Nienaber het ’n merkwaardige verdedigingspatroon vir die Bokke gevestig, waar hulle vinnig na binne toe opskiet en spelskeppers hokslaan. Dikwels laat dit geweldig baie ruimte in die wye kanale, maar die feit dat die Bokke slegs vier drieë afgestaan het in die Wêreldbeker-toernooi, dui op hoe effektief dit is. Die Bokke was ook geweldig aggressief met hul lakwerk en het dikwels dominante duikslae gemaak.

“Dís die moeilike ding vir die teenstander, want dit lyk soos hul ruimte en tog kan min spanne dit benut. Dis iets wat die Bokke fenomenaal goed gedoen het – om ruimte wat eintlik nie daar is nie te verkoop,” sê Laker.

“Die Bokke het ook gebaat by goeie vleuels, het goeie duikslae uitgevoer en die spel geïnterpreteer. En dan was daar ’n agttal met ’n hoë werkverrigting. Dis waarom hulle die ses voorspelers op die plaasvervangersbank gekies het – om seker te maak daardie werklading word gedeel. Die Bokke was fenomenaal.”

Die Stormers kan hulle roem op die kern van die Bokke se agttal, maar Laker brei ’n oorwegende jong agterlyn en wys daarop dat die tempo van Superrugby vinniger as op toetsvlak is.

Norman Laker. Foto: Gallo Images

“Ons speel 16 wedstryde vinnig agtereenvolgens en dit gaan taai wees op die spelers se liggame, maar die Bokke se benadering is iets waarna ons kan kyk. Dit was baie suksesvol vir hulle,” sê Laker.

Die Stormers se eerste wedstryd vanjaar is teen ’n sterbelaaide span van die Hurricanes op 1 Februarie op Nuweland, sal ’n yslike toets op die verdediging wees.

Laker sê die Kapenaars is op koers nadat hulle die afgelope naweek hul voorseisoense voorbereiding met ’n oorwinning van 21-19 oor die Haaie afgesluit het.

“Tot dusver gaan dit goed. Die voorseisoense oefensessies het goed verloop en ons is tevrede,” sê Laker.

“Die wedstryd teen die Hurricanes gaan ’n goeie toets wees om te kyk waar ons staan. Albei spanne sal met die verandering van afrigters vir mekaar onbekend wees. Ons moet nou net op onsself fokus om seker te maak dat ons goed voorbereid vir 1 Februarie is.”

Meer oor:  Jacques Nienaber  |  Norman Laker  |  Stormers  |  Superrugby
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.