Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
Bulle sonder Lood vir stryd teen Leeus
Lood de Jager, slot en kaptein van die Bulle, het sy skouer beseer in die wedstryd teen die Jaguares.Foto: Getty Images

Die Bulle en die Leeus sal Saterdag sonder hulle kapteins wees wanneer hulle mekaar in Johannesburg in die Jukskei-derby aanpak.

Terwyl Swys de Bruin, die Leeus se breier, op hete kole is om te hoor hoe lank die Springbok-agtsteman Warren Whiteley langs die kantlyn sal wees, het Pote Human, afrigter van die Bulle, self slegte nuus gekry oor sy kaptein, Lood de Jager.

Dié Bok-slot het ’n skouerbesering teen die Jaguares in Buenos Aires opgedoen en sal minstens twee weke uit wees.

Dit beteken die Bulle, wat reeds sonder ’n ander Springbok-slot RG Snyman (enkel) oor die weg moet kom, sal sonder De Jager wees in die komende derbies teen die Leeus en die Haaie.

De Jager sal Dinsdag skanderings ondergaan om presies vas te stel wat die omvang van die besering is.

Handré Pollard, die Bulle-losskakel, sal Saterdag die span op Ellispark in die Superreeks aanvoer.

Warren Whiteley, die Leeus se kaptein, verlaat Saterdag die veld teen die Stormers met ’n borsspier-besering. Foto: Gallo Images

Daar word in die Leeus se kamp asem opgehou oor die besering wat Whiteley Saterdag op Nuweland teen die Stormers opgedoen het.

De Bruin het ná die kragmeting, wat sy span met 17-19 verloor het, gesê die besering “lyk nie positief nie”.

“Ek het sy (Whiteley) reaksie in die kleedkamer gesien, maar ons sal maar moet wag en sien,” het hy gesê.

Indien Whiteley ’n borsspier geskeur het, sal hy moontlik die res van die Leeus se Superrugby-veldtog misloop en in ’n stryd teen tyd wees om die Springbokke se Wêreldbeker-groep te haal.

Whiteley het Maandag verdere toetse ondergaan en die Leeus sal waarskynlik Dinsdag ’n verklaring oor sy prognose uitreik.

Dit beteken dat die Springbok-losskakel Elton Jantjies die Leeus sal lei.

Die Zimbabwiër Eli Snyman, wat die naweek een van die Bulle se plaasvervangers was, is in die binnebaan om De Jager se plek in die tweede ry in te neem.

Met Hendré Stassen wat nog in Frankryk is en De Jager en Snyman op die krukkelys, word die Bulle se diepte op slot nou getoets.

Die agterspeler Johnny Kotze is uit die hospitaal ontslaan nadat daar verlede week breinvliesontsteking by hom gediagnoseer is. Kotze sal eers oor drie weke weer oorweeg kan word.

Herman Rossouw, spandokter van die Bulle, het intussen gesê die agterspeler Johnny Kotze is uit die hospitaal ontslaan nadat daar verlede week breinvliesontsteking by hom gediagnoseer is.

Kotze sal eers oor drie weke weer oorweeg kan word.

Die vleuel Travis Ismaiel en die voorspelers Roelof Smit, Jaco Visagie en Jano Venter sal die week saam met die span begin oefen, maar hulle is nog nie wedstrydskerp nie.

Snyman en die Bok-flank Marco van Staden sal oor sowat vier weke weer kan speel.

Meer oor:  Lood De Jager  |  Warren Whiteley  |  Pretoria  |  Johannesburg  |  Rugby  |  Besering  |  Leeus  |  Bulle  |  Superrugby
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.