Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
Chean vee voor eie deur ná nederlaag

Chean Roux, afrigter van Suid-Afrika se o.20-rugbyspan, het die fout by homself eerder as sy span gesoek nadat die Junior Springbokke Woensdag in Stellenbosch met 33-34 teen Argentinië verloor het.

Chean RouxFoto: Gallo Images

“Dit was glad nie ’n goeie vertoning nie, maar ek sal later met die spelers praat. Dit begin by my. Ek sal moet kyk waar ek gefouteer het en hoe ons die wedstrydplan moet aanpas,” sê Roux.

Die wedstrydplan was egter nie soseer die probleem nie. Dit was eerder ’n geval van die Junior Bokke se dissipline wat swak was en veral hul power skrumwerk. Dis moeilik om te glo dat daar in ’n land met soveel rugbytalent soos Suid-Afrika nie sterker stutte is nie.

Daar was nou en dan ’n goeie skrum, maar die Jong Bokke is in daardie faset tot oorgawe gedwing. Hulle het ’n oorstoot- en strafdrie afgestaan omdat hulle nie hond haaraf kon maak in die vaste skrums nie. Skrumwerk was reeds in die Junior Bokke se eerste wedstryd in die internasionale reeks, ’n sege van 58-10 oor Georgië, ’n probleem. Hulle was beter in die daaropvolgende oorwinning van 50-8 oor ’n Namibiese Vyftiental.

“Jy kan nie goeie rugby speel as jy nie jou eerste fases – die skrums, lynstane en afskoppe – wen nie. Ons gaan baie aan ons vaste fasette moet werk,” sê Roux.

Oor die rooi- en geelkaart wat die Junior Bokke help kelder het teen die Poemas – onderskeidelik vir Janko Swanepoel en Emile van Heerden – sê Roux die spelers moet die nagevolge van swak dissipline besef.

“Jy kan nie net 13 spelers op die veld hê nie. Een só ’n fout en dis die einde van die wedstryd,” sê hy.

Daar moet wel in gedagte gehou word dat Roux sekerlik nog nie al sy kaarte gespeel het voordat die o.20-Wêreldtoernooi in Junie in Argentinië afskop nie.

Tans stel hy nog kombinasies op die proef.

Volgende op die SA o.20-span se program is ’n toer Brittanje toe vir wedstryde teen Engeland en Wallis. Hulle vertrek Dinsdag.

“Ons sien uit daarna. Ons wil getoets word, want dit deug nie om al jou wedstryde voor die Wêreldtoernooi te wen en dan dáár te verloor nie. Die toer Brittanje toe sal weer eens die span se karakter toets,” sê Roux.

Meer oor:  Chean Roux  |  Junior Bokke  |  Junior Springbokke  |  Jong Bokke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.