Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
Nóg ’n slot-skok vir Bokke voor Leeus-reeks

Nou is Eben Etzebeth ook op die Springbok-krukkelys!

Midde-in die onsekerheid oor die slotte Lood de Jager en RG Snyman se beskikbaarheid om later die seisoen teen die Britse en Ierse Leeus uit te draf, is daar nou ook kommer oor dié Kaapse yster.

Die Springbok-slotte Franco Mostert, Lood de Jager, RG Snyman en Eben Etzebeth pronk met die Webb Ellis-beker ná die Wêreldbeker-eindstryd teen Engeland. Net Mostert is tans nie beseer nie. Foto: Getty Images

Die Bok se Franse klub, Toulon, het in ’n verklaring aangekondig dat Etzebeth verlede week gedurende ’n oefening ’n vinger gebreek het en “verskeie weke” buite aksie sal wees nadat hy ’n operasie ondergaan het.

Dit is bykomende slegte nuus vir die Springbok-afrigter, Jacques Nienaber, wat voor dié verwikkeling sekerlik diep beswaard moes gewees het oor De Jager en Snyman se beserings.

De Jager, wat in 2019 se Wêreldbeker-eindstryd teen Engeland saam met Etzebeth die beginslotpaar was, het onlangs in ’n oefening van die Sale Sharks sy been gebreek en ’n knieskyf beseer.

Snyman het in Augustus verlede jaar ’n langtermyn-kniebesering opgedoen toe hy sy buiging vir Munster gemaak het. Hy het sedertdien nog nie tot die speelveld teruggekeer nie.

Albei is gewikkel in ’n stryd teen tyd om fiks en skerp te wees voordat die wêreldkampioen se finale voorbereiding in Junie begin om die Leeus aan te durf.

Daar is aanvanklik verwag dat Etzebeth se besering hom sowat ’n maand langs die kantlyn kan hou, maar daar word gevrees dat die “veteraan” van 85 toetse selfs langer op die herstelpad gaan wees.

Geen ander rugbyland het soveel diepte in die posisie nie, maar sonder Etzebeth en De Jager, en dalk ook Snyman, sal die Bokke gewis kwesbaar teen die Leeus wees.

Slotte soos Marvin Orie, Jason Jenkins, Ruan Nortjé of JD Schickerling, wat tussen hulle net vier toetse se ervaring het, sal dan noodgedwonge betrek moet word.

Die voorste spelers in die Verenigde Koninkryk en Ierland het sedert die spel verlede jaar weens die Covid-19-pandemie onderbreek is, twee Sesnasies-kompetisies agter die blad, terwyl die Springbokke nog nie weer ’n toets gespeel het ná die Wêreldbeker-eindstryd in Japan nie.

Die gereedheid van veral die Bok-agttal sal Nienaber onrustig stem.

Benewens die dreigende slot-krisis het die strydros-stut Tendai Mtawarira sy stewels weggepak.

Die Bok-kaptein, Siya Kolisi, was verlede seisoen in die Curriebeker-kompetisie nie naby aan sy beste nie en Pieter-Steph du Toit het eers onlangs weer begin oefen ná die ernstige beenbesering waarmee hy gesukkel het.

Duane Vermeulen het ná die Curriebeker-reeks ’n knieoperasie gehad, maar hy sal op sy pos wees wanneer die Leeus aan die einde van Junie voet aan wal sit.

Dit sal wel nie ideaal wees as Vermeulen se voorbereiding in die komende Reënboogbeker-kompetisie weens Covid-19 tot plaaslike derbies teen die Leeus, Stormers en Haaie beperk word nie.

Meer oor:  Beseer  |  Jacques Nienaber  |  Toulon  |  Britse En Ierse Leeu-Toer  |  Bokke  |  Eben Etzebeth  |  Springbokke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.