Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
Rassie wil nie op Pote se tone trap by Bulle

Rassie Erasmus kan nie help om te lag wanneer hy sien mense sê hy gaan die man wat sy buurman in Despatch was en hom op sy eerste dag skool toe gevat het, mentor nie.

Die Springbok-afrigter sê hy en die nasionale afrigtingspan gaan vir Pote Human, die Bulle se nuwe afrigter, bloot bystaan indien hy hulp benodig.

Rassie Erasmus

Daar het nooit enige waarheid in die gerugte gesteek dat hy die Bulle sou afrig of deeltyds saam met Human sou afrig nie.

“Ons bied ons dienste aan en die Super-spanne het die keuse om ons te benut. As hulle ons wil gebruik, moet hulle sê waar ons kan help – is dit op die aanval, die verdediging of met die skopwerk?” het Erasmus Vrydag aan Rapport gesê.

“Terwyl ons daar is, sal ons hulle ook inlig waar hul spelers staan in die groter prentjie, waaraan dié spelers moet werk en wat hul ‘padkaart’ is.

“As ons op 3 Januarie daar aankom en ek en Pote sit en praat, en hy sê hy het byvoorbeeld vir Jacques (Nienaber) vir twee weke nodig om met verdediging te help, dan sal Jacques daar wees vir twee weke.

“Ons gaan nie die Bulle ‘mentor’ nie. Ek lag daaroor – Pote was my buurman op Despatch en hy het my skool toe gevat op my eerste dag, my rugby leer speel. Daar is geen manier dat ek hom gaan mentor nie,” sê Erasmus.

Erasmus sê wel Human kan dalk hulp nodig hê omdat hy so kort voor die begin van die Superrugby-reeks aangestel is.

“Wat ook al sy behoeftes is, ons sal hom uithelp. Hy gaan natuurlik meer behoeftes as Swys (de Bruin, Leeus-breier), Robert (du Preez, Haaie-breier) en Fleckie (Robbie Fleck, Stormers-breier) hê.

Pote Human

“Ons gaan Pote net bystaan. Dit het niks te doen met sy afrigtingsvermoë nie. Ons wil hom help dat hy op afrigting kan konsentreer.”

Erasmus verduidelik dat sy betrokkenheid by die Bulle ook spelerbestuur voor die Wêreldbeker-toernooi sal verbeter.

“Dit is belangrik om die spelers goed te bestuur in ’n Wêreldbeker-jaar.

“Ek gaan dit met elke Superrugby-afrigter sit en bespreek: Hoeveel minute ’n speler moet speel om vars te wees, hoe gaan ons die gekontrakteerde Springbokke hanteer?”

Erasmus glo die wanopvatting dat hy die Bulle sou afrig of vir Human sou “mentor”, kon voorkom gewees het – veral omdat sy bedoeling was dat die Bulle ’n behoorlike proses instel om die beste moontlike afrigter te kry.

“Wat by die Bulle gebeur, kom van my ervaring toe ek by Munster weg is. Toe ek daar weg is, was daar ’n oorgangsfase waar ek saam met Johann van Graan gewerk het totdat hy oorgeneem het.”

Toe John Mitchell by die Bulle weg is, het Erasmus met Barend van Graan, die Bulle se uitvoerende hoof, gepraat en voorgestel hulle gebruik hul tyd om die beste afrigter te vind.

“Vat die tyd en gaan deur ’n behoorlike proses en as julle die ou kry ná ’n maand, twee maande of ses maande is dit reg.

“Maar julle moet net weet julle het genoeg tyd, want die hele Springbok-bestuur is beskikbaar en ons sal uithelp waar nodig, het ek vir die Bulle gesê.

“Dit is al wat gebeur het, ons het gesê hulle moet deur ’n behoorlike proses gaan en die Bulle het daardie proses self bepaal en hul kortlys opgestel.

“Ons sou nooit gegaan het om te sê ons gaan die Bulle afrig nie.

“Mense sê die heeltyd ek wil die Bulle afrig en ek wil direkteur van rugby speel, maar dit was net ’n manier om te help sodat hulle nie krisisknoppies hoef te druk nie.”

Erasmus gaan in Januarie ook ’n afrigtingskliniek by die Pumas aanbied en het die Cheetahs ook al bygestaan.

Meer oor:  Bulle  |  Pote Human  |  Rassie Erasmus
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.