Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
Wen is nie alles, sê Swys ná Leeus kleitrap

33 verbroude duikslae. ’n Hele handvol aangeë wat in niemandsland beland het. Twee lynstaanballe oor die springers se koppe en twee skrum-inploffings deur die voorry.

Swys de Bruin, die Leeus se afrigter, was gistermiddag vasberade dat daar positiewe aspekte in sy span se Superrugby-wedstryd teen die Brumbies in Canberra was – maar hy kan nie ontken dat daar meer negatiewes was in hul nederlaag van 20-31 nie.

Aphiwe Dyanti het die eerste drie van die Superrugy-wedstryd tussen die Leeus en die Brumbies gedruk, maar die Australiërs het daarna beheer van sake geneem. Foto: Tracey Nearmy/Getty Images

Die Johannesburgers het meer as genoeg balbesit gehad en ook nie ’n uitspattige hoeveelheid tyd in hul eie helfte deurgebring nie, maar hulle het keer op keer in hul eie pad gaan staan wanneer dit gelyk het of hulle begin momentum bou.

Te gereeld is balle net oor die skouer gewerp in die hoop dat ’n spanmaat naby genoeg is om dit op te tel. Te gereeld is ondeurdagte grondskoppies na die dankbare hande van Brumbies-spelers gelanseer. Te gereeld het die Leeus nie hul besit op die grond beskerm nie.

Die span van Johannesburg se groot doodsteek was egter sy verdediging, wat nooit georganiseerd was om die Brumbies aan bande te lê nie. Die Australiërs is net ’n skaduwee van die span wat verdedigingslinies in die Super12 flenters gesny het, maar die Klas van 2019 het steeds die vermoë om met fasespel en flinke voete chaos te saai.

Waar die Leeus ’n paar keer stadig en sleepvoet op die aanval was, het die Brumbies alles volspoed gedoen. Malcolm Marx was in die middelveld ’n yster op die verdediging en gretig om amok op die grond te maak, maar rondom hom het sy spanmaats gevou onder die Brumbies se volgehoue druk.

Hul middag is min of meer opgesom deur ’n oomblik in die 63ste minuut toe hulle ná drie minute van volgehoue aanval in die Brumbies-kwartgebied by ’n losgemaal van die bal af gedruk en tot terug in hul eie helfte gedwing is.

Dit was net een van twee handevol verspeelde kanse.

De Bruin het ná die tyd aan die Australiese media gesê hy is teleurgesteld, maar dat sy span in die lig van die groot aantal jongelinge wat vanjaar aangewend word, nie net speel om te wen nie.

“In dié stadium gaan dit nie oor wen of verloor nie. Dit klink vreemd dat ek dit sê, maar daar is soveel ouens wat ons nou inbring en moet grootmaak,” het De Bruin gesê. “Ons het sedert verlede jaar 13 spelers verloor wat in Europa gaan speel het. Vandag (gister) het ons ’n loskop gehad wat net 20 is (Nathan McBeth), Hacjivah (Dayimani, die agtsteman) is net 20 . . . Dié wedstryde is hoe hulle leer.

“Ons is min of meer op dieselfde plek as wat ons in 2014 was.”

De Bruin moet daarteen waak om net deur daardie bril na gister se wedstryd te kyk. Sy veterane het immers gesukkel om hul stempel af te druk.

Elton Jantjies het die wedstryd uitstekend begin deur die bal met perfekte tydsberekening vleuel toe te stuur vir Aphiwe Dyantyi se drie, en later self agter die doellyn gaan kuier nadat hy ’n los bal opgepik en om drie verdedigers gedans het. Maar hy het ook ’n strafskop weggegooi deur die bal oor die doodlyn te skop, byna die helfte van sy duikslae gemis en twee stelskoppe verbrou.

Ruan Combrinck, wat vir die eerste keer in ses weke in die Leeus se beginspan was, het gewys hy het steeds ’n vaartversnelling om oor huis toe te skryf en ’n oog vir ’n gaping, maar hy het ook sy kanaal wyd oop gelaat om ’n bal te probeer onderskep en saam met sy spanmaats toegekyk hoe die Brumbies se linkervleuel, Toni Pulu, doellyn toe storm sonder dat ’n hand op hom gelê word.

Op die ander vleuel het Dyantyi sterk gestaan onder die hoë bal en 120 m op die aanval gewen, maar ’n bal in sy eie 22 by die kantlyn uitgewerp, terwyl daar nog ’n skrale kans op ’n terugvegpoging was.

Die buitesenter Lionel Mapoe het in sy 100ste Super-wedstryd vir die Leeus ’n vinger in die oog gekry en met ’n bebloede gesig van die veld gestap, maar geen werklike impak gemaak nie.

De Bruin kan met reg tevrede wees dat sy spelers die tempo probeer opdruk het met die bal in die hand – maar hy móét hulle help om dit slimmer te doen. Vinnige hande is meer ’n las as ’n bate wanneer ’n speler nie seker is dat daar ’n ondersteunende spanmaat naby is nie. Aangee net ter wille van aangee, kry nie punte op die bord nie.

Ná twee agtereenvolgende nederlae dreig die wiele nou om van die Leeus-bus te val – en met wegwedstryde teen die Chiefs en Crusaders in die volgende twee weke is dit dalk net om die draai.

Om te skuil agter die leerskool waardeur jou jongelinge gaan, sal dit nie kan keer nie.

  • Punte:
  • Lachlan McCaffrey, Toni Pulu, Tevita Kuridrani, Tom Banks, Tom Wright. Doelskoppe: Christian Lealiifano (3).
  • Aphiwe Dyantyi, Elton Jantjies, Sylvian Mahuza. Doelskop: Jantjies. Strafdoel: Jantjies.
Meer oor:  Brumbies  |  Leeus  |  Swys De Bruin  |  Canberra  |  Superrugby-Wedstryd
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.