Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
WP se skuld aan Remgro gaan net op en op...
Zelt Marais sê die Westelike Provinsie sal slegs na die Kaapstad-stadion verhuis as hulle seker is dat hulle meer geld dáár kan genereer as by Nuweland. Foto: Gallo Images

WP Rugby se leningskuld aan Remgro het tot meer as R50 miljoen gegroei nadat dié rugbyunie nie sy terugbetalings aan rente nagekom het nie.

Volgens Rapport se bronne betaal die WP al ’n geruime tyd nie die rente op die lening nie, wat beteken dat die oorspronklike leningsbedrag van R40 miljoen nou net onder R53 miljoen staan.

Na raming kan die rente in die volgende drie jaar die leningsbedrag tot R80 miljoen laat groei as die WP-base nie die rente begin betaal nie.

Ingeligtes sê dat die WP se geldsake effe beroerd lyk en die unie nie ’n wins maak nie.

Die Nuwelandse toeskouergetalle met die Super-wedstryd teen die Leeus was ook ver benede verwagtinge, terwyl die binnegevegte tussen die amateur- en professionele kante ook die finansiële posisie van die unie benadeel.

Volgens Rapport se inligting het 28 losie-eienaars sedert die begin van die jaar hul kontrakte met die WP opgesê. Die beraamde verlies aan inkomste kan tot R4,5 miljoen beloop.

Volgens Rapport se inligting het 28 losie-eienaars sedert die begin van die jaar hul kontrakte met die WP opgesê. Die beraamde verlies aan inkomste kan tot R4,5 miljoen beloop.

Remgro se lening het in 2016 grootliks die WP van ineenstorting gered.

’n Ultimatum van Remgro in 2018 het daartoe gelei dat die WP sekuriteit vir die lening gegee het.

Volgens ’n prokureursbrief in 2018 het Remgro R7,51-miljoen op 3 November 2016, R7,51-miljoen op 25 November 2016, R19 miljoen op 22 Desember 2016 en R9,88-miljoen in ’n ander stadium aan WP geleen.

Terwyl WP nog nooit erken het dat hulle die Nuweland-stadion as sekuriteit vir die lening gegee het nie, het meer as een bron dit wel aan Rapport bevestig.

Zelt Marais, die WP se president. Foto: Edrea du Toit

Rapport verneem ook dat Zelt Marais, presedent van die WP Rugbyunie, verlede jaar ’n brief van Remgro ontvang het net nadat hy tot president verkies is en hy sekere opmerkings oor die maatskappy en die Remgro-lening gemaak het.

Marais is in die brief glo herinner dat Remgro as krediteur hul lening binne 48 uur se kennisgewing kan herroep indien hulle dit nodig sou vind.

Marais is die afgelope paar maande in ’n magstryd met die WP Maatskappy se raad betrokke. Die magstryd het tot ongelukkigheid onder die spelers en borge gelei.

Remgro se uitvoerende hoof, Jannie Durand, het by navraag van Rapport gesê dit sal onvanpas wees om kommentaar te lewer.

“In die lig van die private en vertroulike aard van die aangeleenthede tussen Remgro Sport Investments (RSI) en die WPRFU sal dit onvanpas wees om in detail op die vrae te reageer.

"Al wat ons kan sê, is RSI is in gereelde gesprekke met die unie om te verseker dat die unie se verpligtinge ten volle terugbetaal sal word, sonder enige vertragings,” het Durand per e-pos aan Rapport gesê.

Al wat ons kan sê, is RSI is in gereelde gesprekke met die unie om te verseker dat die unie se verpligtinge ten volle terugbetaal sal word.
Jannie Durand

Die WP is ook steeds in ’n hofsaak gewikkel met die maatskappy Aerios, wat R250 miljoen van die rugbyunie eis.

Paul Zacks, WP se uitvoerende hoof, en Michael de Vries, WP-woordvoerder, het nie op navrae gereageer nie.

Meer oor:  Remgro  |  Zelt Marais  |  Wp Rugby  |  Skuld
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.