Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Rugby
Zondagh voltooi kringloop by Bulle

Daar is lekker in Pretoria gebrom toe die Bulle aan die einde van verlede jaar besluit het om ’n Kapenaar “in te voer” om die direkteur van rugby by Loftus Versfeld te word.

Die meeste ondersteuners in dié geweste het al vergeet van Alan Zondagh.

Alan Zondagh is die Bulle se nuwe direkteur van rugby. Foto: Gallo Images

Min mense sal egter weet dat dié oudbreier van die Westelike Provinsie en Oostelike Provinsie se rugbylewe, soos Zondagh dit stel, 42 jaar gelede in die hoofstad begin het.

“Die kringloop word nou voltooi en dit is eintlik ongelooflik. “My eerste jaar as ’n getroude man was hier in Pretoria.”

Hy is in 1977 as die weermag se eerste voltydse rugbyadministrateur aangestel nadat hy by die Maties klaargemaak het.

“Dr. (Danie) Craven het my eendag ingeroep en gesê hy hoor ek moet nog weermag toe gaan.

“Hy het gevra of ek nie sommer ’n werk in die weermag wil hê nie.

“Ek het Pretoria toe gekom en Frik du Preez het die volgende jaar (1978) saam met my die weermag se rugbykantoor kom bestuur. Dit was wonderlike tye.”

Zondagh het sy debuut vir die destydse Noord-Transvaal gemaak en het op die bank gesit toe die Ligbloues in 1977 op Loftus teen die Vrystaat in die Curriebeker-eindstryd gespeel het.

“Tommy du Plessis het daardie dag in Barry Wolmarans vasgehardloop en ek was so amper op die veld.

“Ek sal nooit vergeet hoe ek angstig saam met Buurman van Zyl (die legendariese Noord-Transvaal-afrigter) by die tonnel gestaan en wag het vir my kans wat nooit gekom het nie.”

Sy rugbydae in Pretoria is die volgende seisoen beëindig toe hy in Potchefstroom vir die Ligbloues se o.25’s teen Wes-Transvaal se B-span gespeel het.

’n Veel jonger Alan Zondagh, toe hy destyds die Westelike Provinsie afgerig het. Foto: Gallo Images

“Een van hul spelers het my met sy voorarms geloop en toe ek wakker word was ek terug in Pretoria. My kakebeen was op twee plekke gebreek.

“Ek het van my beste rugby hier gespeel.”

Terug na sy nuwe uitdaging by Loftus.

Zondagh sê hy het min geweet hy is op pad terug toe die Bulle hom verlede jaar gevra het om op ’n komitee te dien wat moes help om ’n nuwe hoofafrigter in John Mitchell se plek te kry.

“Ek is daarna ook gevra om ’n oudit van die unie se strukture te doen.

“Toe kom die vraag of ek daarin sou belangstel om die direkteur van afrigting te word.

“Ek het amper nie eens my vrou gevra nie. Dit is ’n helse uitdaging, maar ’n lekker een.

“Niks sal my groter bevrediging gee as om te sien dat die Bulle weer bekers wen nie.”

Daar word wêreldwyd copy en paste-rugby gespeel.

Zondagh skud sy kop wanneer jy hom uitvra oor hedendaagse rugby.

“Daar word wêreldwyd copy en paste-rugby gespeel.

“Hier kan twee spanne op Loftus speel, met onderskeidelik blou en rooi truie.

“Jy ondersteun die blou span. As hulle halftyd in die kleedkamer truie ruil, sal jy diep in die tweede helfte eers besef jou span speel nou met rooi truie.

“Ons moet wegbreek daarvan en iemand gáán dit doen. “Dan sal almal seker weer daardie rigting inslaan.”

Hy was al geskok om te sien tot hoe ’n mate spelers voorgeskryf word, sê Zondagh

“Ons rig op die oomblik robotte af, wat vasgevang is in strukture.

“Daar is mense wat dink dat ek net fokus op aanval en fairy-rugby wil speel. Dit is nie so nie. Ons spanne kan goeie besit kry, maar kan ons dit dan doeltreffend gebruik?”

As ons Januarie (as studente) teruggekeer het Stellenbosch toe, het ons altyd gewonder met watter nuwe nonsens Dok vorendag gaan kom.

Zondagh sê dr. Craven was ’n merkwaardige denker.

“As ons Januarie (as studente) teruggekeer het Stellenbosch toe, het ons altyd gewonder met watter nuwe nonsens Dok vorendag gaan kom.

“En hy was slim. Dít wat nie gewerk het nie, het hy stilletjies uitfaseer sonder om te erken dit was ’n slegte idee.

“Selfs in die tyd toe ek die OP afgerig het, het ek deurgery Stellenbosch toe om by hom te gaan kuier.

“Hy was toe al baie oud, maar het steeds ure se aantekeninge gemaak. Hy wou enduit iets nuut op die rugbyveld probeer het.”

“Ek wil hê ons moet hier by die Bulle nie bang wees om te waag nie.”

En besluitneming. Heng, dit is swak, swak, swák.

Zondagh wil die spelers verder bemagtig nadat Mitchell verlede seisoen die bal aan die rol gesit het.

“Ons moet die spelers, of dit nou Handré Pollard is of ’n outjie wat verlede jaar op die skoolbanke gesit het, afgeronde spelers maak wat in enige spelpatroon kan inpas.

“En besluitneming. Heng, dit is swak, swak, swák. Dit is nie uniek aan Suid-Afrikaanse rugby nie, maar dit is waar die All Blacks die groot voordeel het.”

Meer oor:  Alan Zondagh  |  Bulle  |  Superrugby
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.