Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tennis
2021 se Australiese Ope dalk uitgestel

Die Australiese Ope sal moontlik met ’n week of twee uitgestel word terwyl onderhandelinge tussen die organiseerders, die tennistoere en die Victoria-regering nog nie afgehandel kon word nie.

Martin Pakula, Victoria se minister van sport en toerisme. Foto: Getty Images

Tennis Australië (TA) het Saterdag ’n verslag verwerp wat “bespiegel” het dat die Grand Slam moontlik teruggeskuif kan word van sy geskeduleerde datum van 18 tot 31 Januarie.

“Daar is ’n aantal potensiële datums waarna gekyk word,” het Martin Pakula, Victoria se minister van sport en toerisme, in Melbourne gesê.

“Ek het berigte gesien wat reken dat dit waarskynlik is dat dit met ’n week of twee uitgestel sal word. Ek dink steeds dit is baie moontlik.

“Dit is egter nie die enigste opsie nie. Soos julle weet, is die Franse Ope met verskeie maande uitgestel en Wimbledon het nie eens plaasgevind nie. Ek dink wel dat dit met ’n korter tydperk eerder as ’n langer tydperk uitgestel sal word.”

Dan Andrews, Victoria se premier wat Dinsdag dié staat se 25ste dag sonder enige nuwe koronavirusgevalle gevier het, sê dat hy vol vertroue is dat die toernooi sal voortgaan, maar dat die spelers eers in isolasie geplaas sal word.

“Ons sal ’n Australiese Ope-tennistoernooi hê . . . maar dit gaan anders lyk,” het Andrews gesê.

“Die res van die wêreld is in vlamme, so daar sal isolasie wag op enigiemand wat ons stad of staat binnekom. Daar is geen ander manier nie.

“Ek dink die tydsbepaling sal naby wees aan die normale datums, maar daardie besonderhede moet nog gefinaliseer word.

“So belangrik as wat ’n tennistoernooi is, gaan ons nie ons koronavirus-status in gedrang bring deur enigiets minder as die hoogste standaarde te handhaaf nie,” het hy verder gesê.

Roger Federer vier sy oorwinning oor John Millman op die Australiese Ope in Januarie. Foto: Getty Images

Pakula sê dat die regering reeds op die punt is om die besonderhede rondom die isolasie met gesondheidsowerhede te finaliseer.

“Die vereistes vir kwarantyn sal dit wees waarop eindelik ooreengestem word met die gesondheidsowerhede en dan sal dit ’n kwessie vir die ATP en WTA wees oor of dit aanvaarbaar is,” het hy bygevoeg.

“Streng toetse sal op die spelers wag voordat hulle vertrek en ook wanneer hulle arriveer.”

Craig Tiley, toernooi-direkteur van die Australiese Ope, het Sondag in ’n verklaring gesê dat hy oortuig is dat hy “binnekort” die gesondheidsmaatreëls sal kan aankondig.

Die TA beplan glo ook om al die Australiese Ope se toernooie wat in die aanloop tot dié toernooi plaasvind, soos die ATP-beker, van Victoria na ander stede in die land te skuif. – Reuters

Meer oor:  Australiese Ope  |  Tennis  |  Victoria  |  Melbourne
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.