Siya Kolisi, kaptein, het eers gedink dis sy kamermaat, Cheslin Kolbe, wat hard snork, voordat hy besef het dis ’n aardbewing met ’n sterkte van 4.1 wat die Hamaoka Hotel tref, waar die Springbokke in Sjizoeoka tuisgaan.

“Dis iets verskriklik, ek het nog nooit so iets ervaar nie,” het Kolisi oor Dinsdagaand se aardbewing gesê.

“Ek was opgewonde om dit te beleef, maar terselfdertyd baie bang.”

Geen skade is deur die aardbewing aan die Bokke se luukse hotel op die gholfbaan waar hulle tuisgaan aangerig nie.

Gareth Jenkinson van East Coast Radio, een van die Suid-Afrikaanse joernaliste wat die Bokke in Japan volg, het oor die aardbewing getwiet.

Cheslin Kolbe was toe nie verantwoordelik daarvoor dat Siya Kolisi vroegoggend wakker geskrik het nie. Foto: Gallo Images

“Soos dit uitgedraai het, het ek gisteraand deur ’n aardbewing van 4.0 geslaap,” het Jenkinson onder @gazza_jenks getwiet.

Twee ander Suid-Afrikaanse rugbyskrywers wat in dieselfde hotel as hy in Omaezaki naby aan Sjizoeoka tuisgaan, Liam del Carme van Sunday Times en Ashfak Mohamed van IOL, het wakker geword toe alles in hul kamers geskud het.

“Ek is bly ek het nie wakker geword nie, anders sou ek paniekerig geraak het,” het Jenkinson getwiet.

Van die ander rugbyskrywers op toer soos SuperSport se Gavin Rich is nie deur die aardbewing geraak nie. Hy gaan saam met die oud-Bokke Hanyani Shimange en Jean de Villiers in ’n ander hotel tuis.

* Die veelsydige agterspeler Damian Willemse het hom intussen by die Bokke as plaasvervanger vir die beseerde Jesse Kriel aangesluit.

Damian Willemse het Donderdag die eerste keer saam met die Springbokke in Japan geoefen nadat hy die beseerde Jesse Kriel vervang het. Foto: Gallo Images

Willemse het die afgelope tyd op ’n korttermynkontrak vir die Engelse klubspan Saracens gespeel.

Hy het Donderdag in die Sjizoeoka-stadion waar Vrydag se Wêreldbeker-groepwedstryd teen Italië plaasvind aan die Bokke se kapteinsoefening deelgeneem.

Mark Alexander, president van die Suid-Afrikaanse Rugbyunie, was nog ’n bekende gesig by die kapteinsoefening.

* Kwagga Smith het as ’n voorsorgmaatreël nie Donderdag saamgeoefen nie, nadat hy ’n besering teen Namibië in Toyota opgedoen het.