Rassie Erasmus, afrigter van die Springbokke, het dié span se leierskap onder druk as een van die grootste pluspunte voor volgende naweek se Wêreldbeker-halfeindstryd teen Wallis uitgesonder.

Sy span se afronding was terselfdertyd vir hom ’n teleurstelling in vandag se kwarteindstryd toe die Bokke hard vir ’n oorwinning van 26-3 oor Japan in die Tokio-stadion moes werk.

“Normaalweg as ouens duikslae mis of daar ’n gebrek aan toewyding is, kan harde woorde help,” het Erasmus geantwoord op ’n vraag of daar rustyd met die telling op 5-3 harde woorde in die kleedkamer geval het.

“Maar as dit ’n slegte aangee, ’n verbroude kans of ’n vaardigheidsfout is, gaan dit daaroor om die vertroue van die ouens ’n hupstoot te probeer gee.

“Ek dink dít was rustyd die uitdaging en dit is waar Siya (Kolisi) en Duane (Vermeulen) regtig goedgevaar het.

“Ek dink nie dit was ooit ’n geval van ’n gebrek aan toewyding in die eerste helfte nie. Dit was meer die druk wat Japan op ons met sy intensiteit en hardnekkigheid geplaas het.

“Ons het eintlik baie goed gedoen met betrekking tot ons eie intensiteit, maar ons uitvoering was nie so goed nie.

“Dit was dus nie rustyd regtig harde woorde nie, maar ons het meer probeer om die ouens te kalmeer en aangemoedig om hul uitvoering te verbeter.

“Siya en die manne het die meeste van die praatwerk gedoen en dit uitgesorteer.”

Weens gebrekkige afronding het die Bokke minstens 25 tot 30 punte minder in die kwarteindstryd aangeteken.

“Ons was glad nie goed in hul kwartgebied nie, veral nie in die eerste helfte nie.

“Ons het iets soos vyf keer kanse om drieë te behaal, opgemors. Dis iets waaroor ons rustyd lekker gepraat het.

“As jy diep in hul kwartgebied kom, moet jy met punte daar wegstap. Ons was regtig swak daarmee nadat ons in die vorige toets teen hulle weer goed daarmee was.”

Kotaro Matushima het Makazole Mapimpi in die eerste helfte teen die nek gestamp toe hy ’n hangskop probeer bemeester het, maar is nie daarvoor gestraf nie. Foto: AP

Die Bokke beplan om in die komende dae baie aandag aan dié afdeling van hul spel te gee.

Volgens Erasmus was sy span rustyd nog baie senuweeagtig nadat Japan goeie rugby in die eerste helfte gespeel het. Die Japanse skare was boonop vanweë hul fanatiese ondersteuning ’n intimiderende faktor.

Suid-Afrika was juis vooraf oor Japan se tuisondersteuning en die manier waarop hy teen Ierland en Skotland gespeel het, senuweeagtig.

“Hulle het beslis momentum opgebou. Ons was seker dat dit met die tuisondersteuning wat hulle gehad het, altyd ‘n moeilike wedstryd sou wees.

“Dit was rustyd maar stil in die kleedkamer aangesien ons net twee punte voor was en baie potensiële drieë verbrou het.

“Maar ná 17 weke saam het die ouens geweet watter knoppies hulle moet druk om onsself uit die groef te kry.”

Kolisi het sy spelers rustyd aangemoedig om net aanhou in hul strukture en wedstrydplan te bly glo.

“Ek het ook gesê hulle moet geduldig wees,” het die Bok-kaptein gesê.

“Ons skrums en lynstane het gewerk, maar ons het nie ons kanse in die eerste helfte gebruik nie. Ons wou nie ná rustyd iets verander het nie, ons moes net meer geduld met die bal in hand toon.