WAARSKUWING: VIDEO BEVAT GEKRUIDE TAAL

Die uitgesproke voormalige Engelse rugbyspeler James Haskell sê hy kon nie sy lag hou elke keer wat hy Nieu-Seeland se haka moes trotseer nie.

Die 34-jarige Haskell, wat deesdae in die gemengde gevegskunspromotor Bellator MMA se afdeling vir swaargewigte deelneem, was saam met die voormalige Springbok-kaptein John Smit en Engelse Wêreldbeker-wenner Mike Tindall lid van ’n paneelbespreking oor die All Black-tradisie.

Haskell het 77 toetse vir Engeland gespeel en twee keer vir die Britse en Ierse Leeus uitgedraf.

“Mense dink die haka moet intimiderend wees, maar dit ****** is nie,” sê hy.

“15 mans dans voor jou. Jy wil hulle net gaan bymekaarmaak.”

Tindall sê op sy beurt hy het altyd eerder sy aandag op die losskakel Andrew Mehrtens gevestig as om in die oë van die legendariese vleuel Jonah Lomu te kyk.

“Andrew Mehrtens wat die haka probeer doen is ’n grap,” sê hy.

Smit is natuurlik baie meer diplomaties en beskryf die haka as ’n “voorreg” vir alle Suid-Afrikaners.

“Wanneer jy teen die All Blacks speel besef jy dat jy die kruin van jou loopbaan bereik het, om jou land teen die Kiwi’s te verteenwoordig” sê hy.

“Ek dink ook die haka word verkeerd interpreteer. Die haka gaan meer oor hulle wat respek betoon aan hul kultuur en diversiteit. Hulle stel ook ’n uitdaging aan hul teenstanders en dan hang dit van ons af om die uitdaging te aanvaar.

“Ons put net soveel motivering uit die haka as hulle.”

– Sportredaksie