Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Aktueel
50 Jaar gelede in Die Burger | 11 Junie 1969

Vierde hartpasiënt sterf: Mnr. William (Bill) Killops, Suid-Afrika se vierde hartoorplantings­pasiënt, het gisteraand om 8.50 in die Groote Schuur-hospitaal in Kaapstad gesterf. Long­ontsteking het ook sy lewe geëis, soos dié van mnr. Louis Washkansky, die wêreld se eerste hartoorplantingspasiënt in dieselfde hospitaal sewentien maande gelede. Mnr. Killops het die longontsteking opgedoen ondanks alle pogings om hom in ’n kiemvrye omgewing te hou. Reg in die begin van die siekte was sy toestand baie ernstig, maar ná ’n behandeling het dit verbeter. Die verbetering het egter net ’n kort rukkie geduur. Mnr. Killops – ’n wewenaarvader van drie seuns – het 71 dae lank met sy oorgeplante hart geleef. Intussen het mev. Dorothy Fisher, die vyfde hartoorplantingspasiënt, ook ’n terugslag ondervind. Sy het gewrigsontsteking opgedoen en verduur baie pyn. Dit tas egter nie haar hart aan nie, maar haar vordering is tog effens stadiger as wat dit voorheen was.

Ontug: In ’n veldtog teen ontug het die polisie in die Paarl die laaste paar dae elf mense aan­gekeer op dié Bolandse dorp. Drie van die aangekeerdes was blanke mans en die ander Kleurlingvroue. Uit die klagtes van die polisie teen die vroue blyk dat hulle op straat gedrentel het met die doel om mans uit te lok en prostitusie te pleeg.

Vlieënier sterf: ’n Vlieënier wat nooit met ’n eenmotorige vliegtuig wou vlieg nie, het gister met ’n eenmotorige vliegtuig oor Kaap Colum­bine in die see gestort en gesterf. Hy was mnr. Aubrey Clews (43) van Noordhoek, Kaapstad. ’n Straalvliegtuig-instrukteur van die lugmag, maj. Willem Prinsloo, wat saam met hom in die vliegtuig was, het twee uur lank op sy reddingsgordel in die yskoue see rond­gespartel voordat sy hulpgeroep toevallig deur die kaptein van ’n vistreiler gehoor is en hy opgepik is. Terwyl hy in die water was en die golwe oor sy kop geslaan het, het ’n dolfyn al om hom gedraai. Hy het vergeefs na die dier probeer gryp in die hoop dat dit hom land toe sou sleep.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.