Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Aktueel
Ek dink dis wat Jesus sou doen

’n Mens kan die verhale van Christen-gays ignoreer, of jy kan vra wat Jesus sou gedoen het, skryf Neels Jackson.

Die kerklike gay-debat begin die meeste van die tyd op die verkeerde plekke – by ’n handvol tekste wat oor die Bybel versprei lê: In Genesis, Levitikus, en in die briewe aan die Romeine, die Korintiërs of aan Timoteus. Of dit begin by verhale van pyn wat gay mense in die kerk beleef het.

My uitgangspunt – soos ek dit uiteensit in my boek, Jesus vir almal, is anders. Die tekste hierbo word aan die einde van die boek bespreek, maar ons begin nie daar nie. Daar word na gay mense se verhale geluister, maar ons begin nie daar nie.

Ons moet by God begin. Ons moet probeer verstaan hoe God se hart klop. En die duidelikste openbaring wat ons het oor God, is Jesus Christus. Hy het immers gesê wie Hom gesien het, het die Vader gesien.

Daarom behoort ons by Jesus te begin en oor wat ’n mens in die Bybel van Jesus leer, want die Bybel is vir my rigtinggewend in hierdie gesprek, soos in die res van my lewe.

Jy kan genoeg liefde vir gay mense hê dat jy hul verhale en pyn hoor.

Daar word gekyk na hoe Jesus die wet hanteer, na die evangelie van die koninkryk van God wat Jesus verkondig, na wat Jesus se genesings beteken, na hoe Hy mense insluit wat dikwels verstoot of uitgesluit is, na hoe Jesus in opstand kom teen die onreg teenoor die armes, en na hoe en op grond waarvan Jesus oordeel.

Uiteindelik loop dit uit op ’n onderskeid tussen twee soorte godsdiens, die godsdiens van die Fariseërs en die godsdiens wat Jesus vir ons kom wys.

As ’n mens in die lig hiervan na die kerklike gay-gesprek toe gaan, kom jy voor ’n keuse te staan.

Aan die een kant kan ’n mens die godsdiens van die Fariseërs beoefen. Party mense beoefen selfs die godsdiens van die Fariseërs in die naam van Jesus, maar dit bly die godsdiens van die Fariseërs wat die wet beklemtoon en nie omgee wat dit aan mense doen nie.

Met die godsdiens van die Fariseërs kan jy gay mense se verhale ignoreer en die verwerping wat hulle beleef, miskyk. Jy kan jou kop wegdraai van die selfveragting en selfhaat wat kerklike veroordeling by gay mense kweek, die depressie waartoe dit lei en jou oë sluit daarvoor dat dit vir party mense so ’n ondraaglike las word, dat hulle hul eie lewens neem.

Of jy kan Jesus se benadering volg. Jy kan liefhê. Jy kan genoeg liefde vir gay mense hê dat jy hul verhale en hul pyn hoor. Jy kan fyn genoeg luister dat jy raakhoor dat aanvaarding die sleutel tot gay mense se genesing van hierdie selfverwerping en depressie is.

En dan kan die kerk doen wat Jesus gedoen het. Hy het holisties heelgemaak. En die kerk kan gay mense help heelmaak deur hulle en hul seksualiteit en hul verhoudings volledig en onvoorwaardelik te aanvaar.

Die kerk sou gay mense kon insluit soos Jesus tollenaars en sondaars en vroue en kinders en Samaritane en ’n Romeinse offisier en ’n Kanaänitiese vrou by Sy genade ingesluit het – almal mense wat destyds sosiaal uitgeskuif is, ook deur die godsdienstiges.

Die kerk sou in opstand kon kom teen die onreg en pyn wat gay mense aangedoen is en op plekke steeds aangedoen word, soos Jesus in opstand gekom het teen die uitbuiting van arm weduwees – soveel so dat Hy die tafels in die tempel omgekeer het.

En die kerk sou ’n hantering van God se wet wat mense sonder hoop laat, kon veroordeel.

Die kerk sou meer kon doen as om gay mense te aanvaar. Sy sou hulle met oorgawe kon verwelkom. Sy sou hul uniekheid en hul baie gawes kon vier. Sy sou hul verhoudings kon troetel en ondersteun en hulle help om dit gesond te hou – soos die kerk met heteroseksuele mense se verhoudings probeer doen

Ek dink dit is wat Jesus sou doen. Ek dink so op grond van dit wat ek in die Bybel lees en ek neem die Bybel ernstig op.

Daarom sluit ek die boek af met die volgende woorde:

Ek droom van ’n kerk waar gay mense God se liefde sal beleef.

In my hele lewe het ek niks aangrypender gelees as die verhaal van Jesus van Nasaret nie. In Hom en in Sy verhaal het ek geleer dat God liefde is, dat God barmhartig is, dat God omgee vir mense.

Ek is uitverkoop aan die gedagte van die koninkryk van God, ’n bedeling waar almal omgee vir mekaar, waar ons almal mekaar help om heel te wees sodat ons die lewe in sy oorvloed kan geniet.

Daarom is die aangrypendste oproep in my lewe die woorde van Jesus wat sê: “Volg My!”

Maar ek volg Jesus nie alleen nie. Ek is deel van ’n groot geestelike familie wat onder meer neerslag vind in die georganiseerde kerk, in die kerkgenootskap waarby ek inskakel en in die gemeente waarvan ek ’n lidmaat is. Die kerk is vir my belangrik.

Daarom droom ek dat ons as kerk saam vir Jesus kan volg, dat ons saam met Hom die wêreld met al Sy mense só kan liefhê dat hulle dit konkreet sal ervaar. Ek droom van ’n kerk wat volledig verlos is van die kil godsdiens van die Fariseërs en volledig gevul word met die liefdevolle en helende godsdiens van Jesus.

Ek droom van ’n kerk waar gay mense God se verwelkomende liefde sal beleef, waar hulle volledig aanvaar en verwelkom sal word, waar hul teenwoordigheid gevier sal word.

Ek droom van ’n kerk waar gay gelowiges hul verhoudings in liefde en trou en respek vir mekaar kan uitleef. Ek droom van ’n kerk waar hierdie verhoudings geseën en getroetel word.

Ek droom uiteindelik van ’n kerk waar gay mense se seksualiteit en hul verhoudings nie meer ’n kwessie sal wees nie omdat ons só ingestel is daarop om God se liefde uit te leef waar daar nood is dat ons nie eens meer sal dink of iemand gay is of nie.

Mag die Here ons hiermee help.

  * Neels Jackson is ’n vryskutjoernalis wat spesialiseer in kerksake. Sy boek Jesus vir almal het pas by Lux Verbi verskyn.

Meer oor:  Neels Jackson  |  Ng Kerk  |  Jesus Vir Almal  |  Gays  |  Gayregte  |  Selfdegeslag Huwelike  |  Bybel
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.