Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kommentaar
Beeld, Die Burger en Volksblad sê: Cosatu wys sy roekeloosheid
Cosatu-lede en ondersteuners. Foto: Jaco Marais

Presies hoe uit voeling Cosatu is met die nasionale krisis waarin die land verkeer, is verlede week weer duidelik tentoongestel met die landwye staking.

Cosatu is strate toe onder meer oor die regering se onvermoë om ’n ooreenkoms oor loonverhogings wat in 2018 bereik is, gestand te doen.

Dít in ’n tyd wat die ekonomie erg ingekrimp het weens die Covid-19-pandemie en werkers in die private sektor op groot skaal afgelê word weens onvermydelike begrotingsbesnoeiings.

Hoe geklik lyk hulle en hul eise nie nou nie – veral noudat pres. Cyril Ramaphosa, die kabinet en premiers ’n derde van hul salarisse oor drie maande aan die Covid-19-noodfonds geskenk het.

En terwyl leerlinge spartel om die agterstand met leerplanne uit te wis, dwaal hul Sadtu-geaffilieerde onderwysers met slagspreuke en plakkate in die strate rond.

Nou is dieselfde vakbond heeltemal bereid om nie net die veiligheid van sy eie lede op die spel te plaas nie, maar ook dié van miljoene ander Suid-Afrikaners.

Die res van die land doen alles om ’n tweede vlaag van Covid-19 af te weer deur menslike kontak tot die minimum te beperk, maar Nehawu-geaffilieerde gesondheidswerkers neem deel aan massa-optogte, waar tallose deelnemers sonder maskers opgemerk is.

Dis nou die einste Nehawu wat vroeër vanjaar geëis het dat die regering gesigmaskers, ontsmettingsmiddels en beskermende toerusting verskaf om sy werkers te beveilig.

En nou is dieselfde vakbond heeltemal bereid om nie net die veiligheid van sy eie lede op die spel te plaas nie, maar ook dié van miljoene ander Suid-Afrikaners.

Dit skreeu ten hemele.

Cosatu kan ook nie verbaas wees dat die staat se geld op is nie en loonverhogings vir die afsienbare toekoms onmoontlik is. Hulle is mos juis die ouens wat nog altyd aangedring het dat sukkelende staatsondernemings soos Eskom en die SAL nie geprivatiseer moet word nie, maar kunsmatig aan die lewe gehou word met miljarde rande wat ons nie gehad het nie – en nou nog minder het.

Hoe geklik lyk julle nie nou in hierdie krisis nie. Hoe skril skree julle ideologiese stiksienigheid en eiebelang nie teen almal wat werklik in landsbelang ’n weg uit dié krisis soek nie.

Die regering kan nie anders as om die voet nou dwars te sit nie.

Meer oor:  Cosatu  |  Korrupsie  |  Roekeloosheid  |  Verhogings  |  Staking  |  President  |  Hoofartikel
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.