Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kommentaar
Beeld sê: Grensposte nou ook getref deur swak regering
Mense staan Woensdag in ellelange rye by die Beitbrug-grenspos tussen Limpopo en Zimbabwe. Foto: Rudzani Tshikororo

Die gevolge van jare lange swak regering, veral wat sinvolle beplanning betref, het nou ook Suid-Afrika se grensposte getref.

Uiteraard skep mense se buitengewone bewegingspatrone weens die Covid-19-pandemie onvoorsiene en uitdagende probleme. Maar alle aanduidings is dat die regering nie ’n behoorlike greep op die stand van sake het nie.

Kommer oor die situasie wat die laaste paar weke­ by grensposte, soos Beitbrug, na Zimbabwe, en Lebombo, na Mosambiek, geheers het, is nie orals gedeel nie. Dr. Aaron Motsoaledi, minister van binnelandse sake, ontken eenvoudig dat daar ’n humanitêre ramp was en meen bloot die opeenhopings is weens druk van Zimbabwiërs wat na beter omstandighede wil gaan. En dat die druk oorgespoel het na Lebombo.

En noudat dinge begin normaliseer, wil die parlementêre portefeuljekomitee die twee grensposte besoek – op die oog af mosterd na die maal.

Swak gesondheidstoestande en dreigend humanitêre probleme wat ontstaan die oomblik as ongewone druk ervaar word, is die gevolg van onvoldoende beplanning. Beitbrug en Lebombo is waarskynlik Suid-Afrika se belangrikste twee poorte na en van Afrika.

Die onlangse poging om ’n bykomende heining by Beitbrug te bou om onwettige immigrante te keer, het vir die soveelste keer op korrupsie uitgeloop.

Daarom moes die nodige opgraderings en aanpassings aan die hand van medium- en langtermynbeplanning lankal plaasgevind het. Die onlangse poging om ’n bykomende heining by Beitbrug te bou om onwettige immigrante te keer, het vir die soveelste keer op korrupsie uitgeloop.

Indien die parlementêre portefeuljekomitee enige waarde wil toevoeg op sy (duur) uitstappie, sal daar ’n behoorlike bestekopname van toestande by die grensposte moet wees. Daar sal ook deeglik ondersoek moet word of Motsoaledi en die regering se reaksie voldoende was. Stappe is ook nodig vir multidepartementele oplossings. Dit sluit in noue samewerking met private belangegroepe, soos padvervoerverenigings, wat die regering vergeefs vooraf gewaarsku het dat probleme op hande is.

Die regering moet ook sy diplomatieke vaardighede met buurlande in die Suider-Afrikaanse Ontwikkelingsgemeenskap opskerp. Dit is belangrik sodat gemeenskaplike streekdoelwitte oor grensbeheer en standhoudende lewensvooruitsigte vir mense in hul onderskeie lande nagestreef word.

Meer oor:  Limpopo  |  Beitbrug  |  Grensposte  |  Heining  |  Korrupsie
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.