Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Menings
Dié benadering van Trump is die regte ene

Hoe benader ’n verantwoordelike staatsman ’n skurkstaat?

Dié vraag is opnuut aktueel ná die nuus dat Noord-Korea selfs vóór die mislukte spitsberaad verlede week tussen pres. Donald Trump en Kim Jong-oen begin het met die herbou van ’n missieltoetsterrein. Dit is dieselfde terrein wat hy weens Amerikaanse druk vantevore met ’n groot gedruis begin afbreek het.

Die antwoord is dus: Dit hang daarvan af hoeveel skade die skurkstaat kan aanrig. Is dit Venezuela, wie se vermoë om chaos te saai enigsins beperk is? Dan is jou beweegruimte relatief groot.

Is dit Noord-Korea, wat in staat is om sy onmiddellike omgewing en selfs belangrike dele van Amerika met sy kernwapens in puin te lê? Dan is die antwoord: Baie, baie versigtig.

Aanvanklik het Trump toegelaat dat sy impulsiwiteit en aggressie met hom weghardloop. Hy het Kim “Little Rocket Man” genoem, wat geantwoord het met “dotard” (seniele ou gek), en hulle het mekaar met totale uitwissing gedreig.

Presies hoe die ommekeer gekom het, sal historici eers later kan bepaal wanneer die argiewe van die Withuis en die departemente van buitelandse sake en verdediging beskikbaar word.

Een teorie is dat Trump se harde taal deel was van ’n fyn uitgewerkte strategie om Kim na die onderhandelingstafel te intimideer.

’n Ander is dat hy ingesien het dat sy openbare geskel die Noord-Koreane net aggressiewer maak en dat hy toe self sy benadering verander het.

Hoe nou verder? Die een groot voordeel uit die twee spitsberade is dat hulle nou ten minste praat en mekaar nie uitskel nie.

Wat ook al die geval is, dis goed dat Trump en Kim mekaar nou al twee keer in die oë kon kyk. Praat is altyd beter as skel, want skel kan te maklik lei tot skiet – en skiet moet in dié geval byna noodwendig tot die dood van honderdduisende, dalk miljoene, mense lei.

Die probleem is dat die twee berade op die oog af nie tot verskriklik veel gelei het nie. Geen ooreenkoms is bereik nie. Noord-Korea het nie afgesien van sy kernwapen-arsenaal nie. Soos pas geblyk het, word die ontwikkeling van toetsterreine hervat.

Trump se reaksie was dat hy “baie teleurgesteld” sou wees as die nuus korrek is – ’n baie terughoudende en flou reaksie. Waarmee hy essensieel dieselfde doen as Barack Obama en ander moondhede rakende Iran se kernwapenprogram, iets wat Trump voortdurend as swak afgeskilder het.

Dit was nie swak nie. En Trump se huidige terughoudendheid is die regte reaksie, want ’n skurkstaat soos Noord-Korea (en Iran) pak jy baie, baie versigtig aan. Dit wil sê as jy verantwoordelik wil optree.

Hoe nou verder? Die een groot voordeel uit die twee spitsberade is dat hulle nou ten minste praat en mekaar nie uitskel nie. Maar moenie illusies hê nie. Voordat Kim van sy kernwapens afstand doen, sal baie water nog in die see moet vloei.

Meer oor:  Donald Trump  |  Kim Jong-Oen  |  Skurkstaat  |  Staatsman
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.