Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Menings
Ivor Price: Hulle het hulle toe opgehang oor ’n bord kos
Ivor Price

In my matriekjaar skryf my Afrikaansjuffrou in ’n boodskapboekie ’n vermaning wat ek vandag nog in my binneste saamdra, veral in daai ongemaklike oomblikke wanneer ek tot tien moet tel, en dan weer van een af tien toe.

“Kies jou woorde versigtig,” staan in die ­boekie geskryf.

Dis al.

Nie “alles van die beste” of enige van daai soetsappige frases wat mense gewoonlik in sulke situasies uitspoeg nie, maar ’n vermaning aan ’n kind wie se woordpotensiaal sy reeds op die skoolbanke raakgesien het.

Soms wonder ek hoekom sy my juis met daai boodskap moes groet, maar ander kere – wanneer ek met woorddinge flankeer – sien ek ook die ligter skakering in haar boodskap.

So laat weet ’n vriend uit Port Elizabeth daar’s by ’n groot familiegedoente kos gemaak en veral die herderspastei wat hy as ’n oumakind met die oog gesteel het, was ’n groot treffer. Die mense het hulle opgehang, skryf hy in sy SMS – sonder ’n smiley face of enige ander aanduiding dat dit net ’n onskuldige uitdrukking is.

Dit was ’n lang dag en ek het al ingesluimer, sommer hier op die bank voor die radio terwyl Margot Luyt met die einste vers-en-klank
doenig was.

Eers vererg ek my, want hierdie vriend van my kén van kosmaak, en om nou te wil massaselfmoord pleeg oor ’n aandete is ietwat dramaties. “Nee,” skryf hy byna oombliklik ­terug. “Opgehang beteken hulle het dit geniet; vir seconds gevra.”

En so leer ek nog elke dag interessante ­woorde wat vriende van oor die land heen steeds gebruik. Dit is woorde wat ons aan mekaar bind. Dikwels beskrywend en speels. Lig en moeiteloos – so omgekeerd anders as die regstreekser manier van praat wat ek in die Kaap kom kry het.

Soms moet ek twee keer luister. Ander kere moet ek dom vrae vra om nie in die mees basiese gesprekke dom te lyk nie. As dit regtig nie anders kan nie, ontaard dit in ’n histeriese lagbui met my, die woordmens, wat nog dae later in die stilte daaroor giggel.

Nou’s daar weer ’n nuwe sêding wat dié “Baai-naar” (moet asseblieftog nie praat van die woordeboek se “Baaienaar” nie) van verlof saamgebring het.

Elke derde sin bevat die term “nie bietjie nie”, wat eenvoudig “baie of veel” beteken. Dit maak nie altyd vir my sin nie.

Die vakansie was nie bietjie lekker nie, sê hy nourieaand terwyl ons tee maak om die dag se dinge ordentlik in perspektief te kan plaas.

My onmiddellike reaksie was om te simpatiseer omdat die paar dae by die huis toe nie welverdiende sielerus gebring het nie. Dit blyk toe eerder ’n positiewe uitdrukking te wees. Dit was inderwaarheid ’n baie lekker vakansie.

Nou sê net so, sê ek kamma vererg. Hy’t mos darem al self ’n paar jaar in die Kaap gebly. Hy kon mos net gesê het hy’t sy lyf ’n tyd gegee.

Meer oor:  Ivor Price  |  Mening  |  Kos
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

NETWERK24 Stemme

Hallo, jy moet ingeteken wees of registreer om artikels te lees.