Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Menings
Vra dr. Jani: Wat sit éintlik agter aanval op dr. Jani se trooswoorde?

Dr. Fanie Melani, BPsych, PsyD, DSO, Phd, VC, van Malelane skryf:

Ek neem geruime tyd al met kommer kennis van wat in hierdie rubriek aan die gang is. Vandag stel ek dit prontuit: Dr. Jani is geen berader nie. (Is sy ooit ’n doktor?)

Sondag ná Sondag word hierdie ruimte – en ek neem aan dit is kosbare ruimte in taai tye vir die drukmedia – gewy aan die bisarste gebabbel. Alles onder die vaandel van ’n sogenaamde “troostannie” wat “help”.

Dit is ook onduidelik wat presies die mense se “probleme” is wat inskryf. Hulle skryf nie oor huweliksprobleme of geldprobleme of dwelmprobleme nie. Nee, dis losse waarnemings oor gebeure in Suid-Afrika wat glo veronderstel is om snaaks te wees.

En dan kry dr. Jani dit telkemale reg om wat ook al die “vraag” was, te ignoreer en haar antwoord woeps-waps te muteer in ’n aanhaling uit ’n Bob Dylan-liedjie of ’n boek oor die Eerste Wêreldoorlog.

  • Neem byvoorbeeld ’n rympie wat Breyten Breytenbach in 1961 in potlood agterop die sportblad van Le Monde geskribbel het. Dit hou nie verband met enigiets nie, maar dr. Jani lag en sê: “lekker!” en maak dit sommer haar eerste sin.
  • Wat van ’n obskure aanhaling uit ’n obskure fliek? “Welkom, welkom, dis heel gepas hier!” giggel sy.
  • En ’n flou waarneming oor Springbokrugby of Julius Malema? “Kom, jong, hier is plek vir jou,” glimlag sy teer en tik verder.

Dan is daar “Oom Abrie” om op staat te maak wanneer haar skrywe einde se kant toe staan. (Bestaan hy ooit regtig?) “Oom Abrie” het altyd mos “gister” iets gesê of gedoen wat die geleentheid gee vir nóg ’n aanhaling. En dan is dr. Jani oor die laaste hekkie en op pad na die eindstreep – al wat kort is haar weeklikse belaglike laaste sin.

Sy tik: “Sterkte. En groetnis!”

Dan: File: Save. Send. Nog ’n week verby. Nog ’n klomp twak persklaar.

Sterkte.

Want dr. Jani sál ontmasker word.

Oom Abrie antwoord:

The sweet pretty things are in

bed now, of course

The city fathers, they’re

trying to endorse

The reincarnation of

Paul Revere’s horse

But the town has no need

to be nervous . . .

’Skuus, dr. Fanie. Dr. Jani is uitstedig. Ek hou die fort. Jy maak ’n paar geldige punte, maar klink vir my uitermate kwaad? Hoe so? Wat pla eintlik?

Vrede!

Meer oor:  Vra Dr. Jani
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.