Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Vermaak
TELEVISIE
30 minute en hy’t gepak vir avontuur
Oor net minder as twee weke begin Mooiloop! op SABC2. Dit is ’n splinternuwe leefstyl-en- reisprogram. Rozanne Els het by Denvor Phokaners, een van die aanbieders, oor sy avonture op dié program gepraat.
Denvor Phokaners is een van die aanbieders op SABC2 se nuwe program, Mooiloop!.

V Jy het voorheen aan Rice Mzansi en Colour TV gewerk. Hoe het jy lid van die Mooiloop!-span geword?A Dit was eintlik heel eenvoudig. Ek het ’n oproep van die vervaardigingsmaatskappy ontvang om ’n skermtoets saam met (mede-aanbieder) Valiant Swart te doen. Ek het dieselfde dag nog gehoor ek het die werk gekry en daardie naweek het ons in Cullinan begin skiet.

V Hoekom wou jy deel van die program wees?A Daar is twee towerwoorde vir my: reis en avontuur. As jy daardie twee kombineer, is ek reg om te laat waai. Dít is wat my belangstelling in die program geprikkel het. Ek is ook baie nuuskierig om meer uit te vind oor die mense wat in die klein dorpies in Suid-Afrika bly. Die kykers kan saam met my die juwele van ons land ontdek.

V Julle besoek uiteenlopende plekke in dié program. Is daar een bestemming wat uitstaan?A Ek is verlief op Riebeek-Kasteel – die prag, die landskappe, die mense . . . Alles in die regte balans.

V Julle ontmoet seker ook baie uiteenlopende mense. Is daar iemand wat in jou hart gekruip het?A Ek was stomgeslaan deur die talent van die Davids-susters (die Idols-wenner Sasha-Lee Davids en haar susters in Atlantis). Hulle kan almal sing, maar regtig sing. Die mense van Philadelphia was ook regtig gasvry.

V Wat was die vreemdste ervaring wat jy tot nog toe op die stel gehad het?A Ek onthou hoe ek in die krokodilkamp in Deneys- ville gestap het. Daar is omtrent 1 500 krokodille daar. Ek kon nie glo dat ek tussen hulle gestap het nie. Dit was vir my ’n onwerklike ervaring. Ek het ons kameraman groot laat skrik toe ek sy been gryp!

V Het jy enige uitdagings tydens verfilming ervaar?A Nie regtig nie. In een van die klein dorpies het ek wel lelike rassisme teëgekom. Dit was nie op een van ons gemik nie, maar die gesprekke was lelik.

V Raak jy ooit senuweeagtig wanneer die kameras begin rol?A Nie senuweeagtig nie, maar my maag borrel van opwinding. Die lekker ding van aan Mooiloop! werk is dat dit ’n baie natuurlike program is. Daar is nie teks om te onthou nie, net die eerlikheid van ons ervaring wat ons vir die kyker uitdruk. Daar is niks om oor bekommerd te wees nie. My vrou het wel gesê ek moet seker maak my maag is ingetrek vir die kamera!

V Jy reis baie vir werk. Is jy iemand wat hou daarvan om jou tasse vir ’n avontuur te pak?A Ek is mal oor reis. Ek het al baie internasionaal gereis, maar daar is iets spesiaal aan ons land. Ek is die soort persoon vir wie jy net 30 minute hoef te gee en ek sal gereed wees om na ’n oerwoud te gaan. Ons avonture in Mooiloop! sal jou na baie van die klein dorpies in Suid-Afrika neem. Kykers gaan verbaas wees oor wat en wie ons ontdek.

V Mooiloop! neem die joernaalprogram Pasella se tydgleuf vir ’n ruk oor. Hoe beplan julle om hul lojale kykers oor te haal om by Mooiloop! in te skakel?A Nuwe plekke, nuwe mense, baie lag, baie opwinding en baie avonture wag op kykers. Laat ons net in jul sitkamers toe en julle sal nie spyt wees nie.

V Die sanger Valiant Swart is jou mede-aanbieder. Hoe is dit om saam met hom te werk?A Valiant is ’n storieverteller en ’n fantastiese musikant. Ek is mal daaroor om na sy stories te luister. Ons is albei mal oor musiek, maar hy deel nie altyd my liefde vir van die meer gewaagde avonture wat ek onderneem nie. Ons het van dag een gekliek. Ek kan net eggo wat hy een dag vir my gesê het: “Ons gaan nog ’n lang pad saam loop.”)

  • Mooiloop! begin op Woensdag 26 Junie om 19:30.
Stemme

Hallo, jy moet ingeteken wees of registreer om artikels te lees.