Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
2 SA skrywers vir internasionale prys benoem
Jaco Jacobs

Twee Suid-Afrikaanse kinderboekskrywers is vir die internasionale Hans Andersen-prys benoem. Dit is een van die oudste pryse wat internasionaal vir kinderboeke toegeken word. Jaco Jacobs is onderskeidelik as skrywer en Niki Daly, ook ’n gevierde kinderboekskrywer, as illustreerder benoem.

Die pryse word deur die International Board on Books for Young People (IBBY) toegeken en vereer ’n lewende skrywer en illustreerder vir hul blywende bydrae tot kinderliteratuur. Die prys vir skrywers is in 1956 en dié vir illustreerders in 1966 begin.

“Dit is ’n enorme eer en nogal uit die bloute. Ek voel nederig as ek sien wie benoem is, dit is werklik die grotes. Wat lekker is hiervan is die internasionale blootstelling wat dit ’n mens gee,” sê Jacobs.

Jacobs het al meer as 150 boeke vir kinders en jong mense geskryf. Dit sluit prenteboeke, kinderverseboeke en niefiksie in. Daarby is hy ook ’n gedugte vertaler van nagenoeg 250 kinderboeke in Afrikaans. Hy is al telkemale vir sy werk bekroon. Onder die titels waarvoor hy bekend is, tel onder meer My ouma is ’n rock-ster (My Granny Is a Rock Star, 2004) en Wurms met tamatiesous en ander lawwe rympies (Worms in Tomato Sauce and Other Silly Poems, 2005).

Hy is baie in sy noppies, maar het geen illusie dat hy gaan wen nie, sê Niki Daly.

Niki Daly

“Ek het gemengde gevoelens oor pryse en weet nooit hoe hulle daardie verstommende lys tot een wenner gaan afskaal nie. Dit is wonderlik dat Suid-Afrika weer opgeneem word in die ‘kompetisie’,” sê hy.

Hy is ook al twee keer vir die Astrid Lindgren-prys benoem.

Met sy boeke stuur hy boodskappe aan kinders, sê Daly. “Dit is boodskappe van hoop, die aanleer van bedagsaamheid, hoe om deur jou probleme te werk, en so meer.”

Hy het as kind reeds begin teken in die koerante se wit ruimtes en het eers in die advertensiewese gewerk voordat hy voltyds boeke begin skep het. Hy beskou homself nie as ’n natuurlike skrywer nie en volg die riglyn om sy skrywes soos lirieke te laat klink sodat dit mooi klink as dit voorgelees word, vertel die eertydse liriekskrywer en musikant.

Daly se boeke is wyd bekroon in Suid-Afrika, Brittanje en Amerika en van sy boeke het ook op die IBBY-ererol verskyn: The Boy on the Beach (1998) in 2000, Yebo, Jamela! (ook uitgegee as What’s Cooking, Jamela! 2001) in 2004, en The Herd Boy (2013) in 2014.

Meer as 50 boeke, wat hy self geskryf en geïllustreer het, het al die lig gesien. Sy illustrasies skep ’n bewussyn van ander kulture en wakker interkulturele begrip aan omdat hy kinders uitbeeld soos hulle is, maak nie saak in watter gemeenskap of maatskaplike sfeer hul grootword nie.

* Die Engelse vertaling van Jacobs se boek Oor ’n motorfiets, ’n zombiefliek en lang getalle wat deur elf gedeel kan word (A Good Night for Shooting Zombies) is ook op die langlys van die Carnegie-medalje.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.