Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Boek oor Hendrik Witbooi nou in Afrikaans beskikbaar
Die omslag van die boek Ek is Hendrik Witbooi, wat uit Nederlands vertaal is.

’n Afrikaanse vertaling van Conny Braam se Nederlandse roman Ik ben Hendrik Witbooi oor dié eertydse Nama-leier wat al die Nelson Mandela van Namibië genoem is, is onlangs deur Protea uitgereik.

Die digter Zandra Bezuidenhout het die Afrikaanse vertaling behartig.

Sy reken Ek is Hendrik Witbooi (Protea) is ’n aanwins vir Afrikaanse lesers.

“Min van ons is bekend met die eiesoortige bydrae wat hierdie leiersfiguur in die destydse Suidwes-Afrika gelewer het. Die Afrikaanse weergawe bied aan plaaslike en Namibiese lesers, en ook aan buitelanders wat Afrikaans magtig is, ’n gulde geleentheid om perspektief te kry op Hendrik Witbooi – as mens en vir die omstandighede waarbinne hy opgetree het, insluitende die rol van ander inheemse bevolkings en dié van die Duitse koloniste. Hoeveel van ons sou hierdie kosbare publikasie in Nederlands lees?”

Hendrik Witbooi en sy Namavolk het in 1884 ’n profetiese trek na die vrugbare noorde aangedurf om aan die droogte van die Kalahariwoestyn te ontkom.

In dieselfde tyd het die keiserlike afgevaardigde dr. Heinrich Goering sowat 100 km daarvandaan aangeland in die nuwe Duitse kolonie Suidwes-Afrika, vandag Namibië.

“Dit is ’n rasegte historiese roman. Dit wil sê, ’n omvangryke en boeiende verhaal vol menslike drama wat in ’n bepaalde tydperk in die geskiedenis afspeel, met historiese figure as die hoof- en bykarakters."

“ ’n Mens kry die idee dat Conny moeite gedoen het om ’n eksterne verteller te skep wat geen spesifieke politieke agenda het nie,” sê Bezuidenhout, ook die Afrikaanse vertaler is van die Nederlandse digter Alfred Schaffer se bekroonde bundel Mens dier ding, wat die geskiedkundige figuur Shaka in ’n hedendaagse konteks plaas.

“Dit is ’n rasegte historiese roman. Dit wil sê, ’n omvangryke en boeiende verhaal vol menslike drama wat in ’n bepaalde tydperk in die geskiedenis afspeel, met historiese figure as die hoof- en bykarakters. In hierdie geval word stryd, onreg, lyding, lydsaamheid, en selfs verleiding, verbeeldingryk ingeklee met filmiese beskrywings, gesimuleerde gesprekke en geloofwaardige tonele, maar dan altyd onderbou deur werklikheidsgetuienis.”

Braam het gedurende haar twee jaar lange verblyf in Namibië baie navorsing oor Witbooi gedoen.

Sy het onder meer tot sy dagboeke en briewe toegang gehad en inligting uit die Duitse argiewe gebruik.

“Wanneer bepaalde gruweldade in die roman aan die lig kom, is dit die feite wat spreek,” sê Bezuidenhout.

“Wanneer die ontberings en persoonlike leed van verskillende partye beskryf word, gebeur dit met die nodige deernis, maar sonder goedkoop oordrywing.”

Bezuidenhout geniet die vertaling van enige genre.

“As die gegewe en die vertelstyl my aangryp, soos hier gebeur het, raak ek meegevoer en die vertaling vloei byna spontaan. Jou oor skakel op ’n vreemde manier oor na ’n ander rat, en jy hoor die beskrywings en dialoog byna onmiddellik in die doeltaal. En deur ’n teks op ’n verantwoordelike wyse in ’n ander taal staan te maak, eg en natuurlik, lewer jy ’n diens aan die skrywer, die leser, die uitgewer en les bes, die taal. Min opdragte kan op hierdie tydstip meer vervullend wees. Met Ek is Hendrik Witbooi in die hand deel lesers in die vertaler se genot.”

*Ek is Hendrik Witbooi is deur Protea uitgereik en kos R295.

Meer oor:  Protea  |  Vertaling  |  Boeke  |  Geskiedenis
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.