SPESIALE VAKANSIE-AANBOD: Teken in teen net R49 vir jou eerste maand! Word 'n intekenaar
Boeke
Digter het homself ‘nooit in terme van kleur’ beskou

Die skrywersgemeenskap is steeds geskok ná die skielike dood Sondag van ’n Noord-Kaapse digter, skrywer, joernalis en aktivis.

Sandile Dikeni (53), voormalige kunsredakteur van die Cape Times en anti-apartheidsaktivis, is aan tuberkulose dood nadat dit die derde keer by hom gediagnoseer is.

Boodskappe van medelye het Dinsdag steeds op sosiale media ingestroom, onder andere van Ruby Marks, ’n Suid-Afrikaanse ambassadeur.

Dikeni is op Victoria-Wes in die Noord-Kaap gebore en het regte aan die Universiteit van die Witwatersrand en die Universiteit van Wes-Kaapland studeer.

Sandile Dikeni (53), joernalis, digter en aktivis, is Sondag aan tuberkulose dood. Foto: Verskaf

Hy was ook redakteur van Die Suid-Afrikaan.

Volgens News24 was Dikeni in ’n stadium die woordvoerder van Lindiwe Sisulu, voormalige minister van menslike nedersettings en nou die minister van waterwese en sanitasie, en een van Suid-Afrika se prominentste maatskaplike kommentators.

Hy het die afgelope paar jaar by sy suster in Khayelitsha, Kaapstad, gewoon.

Ryland Fisher, voormalige redakteur van die Cape Times,

het bevestig hy is aan tuberkulose dood.

Hy sê toe hy Dikeni in die negentigs as kunsredakteur aangestel het, was daar baie teenkanting.

“Baie mense was omgekrap oor sy aanstelling, want dit was toe die koerant merendeels wit lesers gehad het.”

Fisher sê hy dink baie het nie gedink Dikeni sal die mas opkom nie, en selfs gehoop hy sal misluk.

“Hy het hom egter baie goed van sy taak gekwyt en só die lesers se vertroue gewen.”

Dikeni het homself nooit in terme van kleur gedefinieer nie, sê Fisher.

“Hy het nooit na homself as ’n swart Suid-Afrikaner verwys nie. Net ’n Suid-Afrikaner.”

Marks, wat saam met Dikeni gestudeer het, het in ’n inskrywing op Facebook gesê sy kon sy liefde deur die “tralies van armoede” in sy gedigte hoor.

“Ek kan onthou hoe hy die lokaal aan die brand gesteek het met sy gedig ‘Guava Juice’, dit wat ons ’n petrolbom noem.

“Shake, shake my comrade/shake that invention of the working class/shake that unifying medicine before it’s too late/shake before the time comes to pass/shake that guava juice’.”

Dikeni het dié gedig geskryf toe hy in die destydse Victor Verster-gevangenis was.

Dikeni se pa is glo ook gedurende apartheid in hegtenis geneem toe hy valslik daarvan beskuldig is dat hy ’n klein nedersetting se watertoevoer vergiftig het.

“Hy is gemartel voordat hy vrygelaat is in ’n gemeenskap wat oor dié kwessie uitmekaargeruk is,” sê Marks.

Meer oor:  Sandile Dikeni
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.