Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Korona-kinderboek blitsvinnig in Afrikaans vertaal
‘Koronavirus: ’n Boek vir kinders’ is gratis op La
‘Koronavirus: ’n Boek vir kinders’ is gratis op Lapa se webwerf beskikbaar.

Lapa-uitgewers en die skrywer Jaco Jacobs het in ’n rekordtyd die regte van ’n Engelse kinderboek oor die koronavirus bekom en dit in Afrikaans vertaal sodat hulle dit as ’n gratis e-boek in Suid-Afrika kan uitgee.

Jacobs sê hy het die boek Coronavirus: A Book for Children deur Elizabeth Jenner, Kate Wilson en Nia Roberts op ’n Maandagaand op die Britse uitgewer Nosy Crow se Facebook-blad gesien.

Die uitgewer Nandi Lessing-Venter het die vertaalregte namens Lapa drie dae later bekom – en Jacobs het die boek binne ’n dag vertaal.

Teen die Vrydagaand kon hy danksy die uitlegkunstenaar Linki Brand reeds die proewe van die Afrikaanse vertaling, Koronavirus: ’n Boek vir kinders, vir sy dogters in hul speeltent lees.

Hy sê dit was ’n blitspoging deur al die betrokkenes én ’n “heerlike uitdaging”, wat vir ’n baie belangrike rede aangepak is.

“Kinders hoor oral van die virus, hulle ervaar hoe bekommerd hul ouers is, hul eie lewe is ontwrig met die skole wat gesluit is en dat hulle nie hul maats mag sien nie,” sê Jacobs.

“My eie twee dogters, Mia (8) en Emma (5), het baie vrae oor wat die koronavirus is, waarom ons moet tuis bly, en hoe dinge moontlik ná die staat van inperking gaan werk. Dié boek beantwoord dié vrae op ’n toeganklike, kindervriendelike manier.

“Ek het gevoel deur die boek te vertaal, kan ons Afrikaanse kinders help om die pandemie beter te verstaan, sommige van hul vrese daaroor te besweer, en hulle help om veilig te bly.”

Vir my was dit ’n manier om in hierdie uitdagende, skrikwekkende tye iets terug te gee aan ouers en jong lesers, ’n boek wat hulle kan troos en bemagtig. Dit sou verkeerd gevoel het om finansieel daaruit te probeer munt slaan.
Jaco Jacobs

Jacobs sê die boek is ’n niefiksie-boek wat op kinders tussen vyf en tien jaar oud gemik is.

“Dit is geskryf in samewerking met ’n voorste Britse spesialis in die modellering van aansteeklike siektes, en die boek beantwoord vrae soos: Wat is die koronavirus? Wat gebeur as jy die koronavirus opdoen? Waarom moet ons tuis bly? Hoe voel dit om heeltyd tuis te bly? Wat kan ek doen om te help? Wat gaan gebeur wanneer die staat van inperking verby is?”

Hy het bevestig dat nie hy, Lessing-Venter, Brand of enige van die oorsese rolspelers – insluitende die bekroonde The Gruffalo-illustreerder, Axel Scheffler – vir die skep van die boek betaal is nie.

“Vir my was dit ’n manier om in hierdie uitdagende, skrikwekkende tye iets terug te gee aan ouers en jong lesers, ’n boek wat hulle kan troos en bemagtig. Dit sou verkeerd gevoel het om finansieel daaruit te probeer munt slaan.”

Die boek, in ’n EPUB-formaat, is gratis op Lapa se webwerf, www.lapa.co.za, beskikbaar. ’n Gratis e-leesprogram kan ook op die webwerf afgelaai word om die boek te lees.

Meer oor:  Koronavirus  |  Lapa  |  Covid-19-Pandemie  |  Lapa-Uitgewers  |  Boeke  |  Jaco Jacobs  |  Covid-19
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.