Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Kostelike konyn kry weer lewe
Hasie van fluweel

Die MER-prys wat Theodore Key vir sy illustrasies van die Die legendariese Lua Verwey ontvang het, was gaaf ja, en R17 500 vir ’n kunstenaar nie te versmaai nie, maar waarna hy nou die meeste uitsien, is die publikasie van Die hasie van fluweel in Oktober.

Hoe dan so?

“Dit is ’n klassieke Britse verhaal, The Velveteen Rabbit van Margery Williams wat omtrent 100 jaar gelede geskryf is, ’n geliefde boek en al deur baie mense gelees. En nou het ek die kans gekry om my idee van die hasie te teken en die karakters wat sy lewe bevolk.”

Key se karakters lyk effens ongemaklik. Hy skep hulle doelbewus “ungainly and odd” – dit glo hy is die sukses van sy werk.

Die rabbedoe Lua Verweymet haar wipneus en knopknieë.

Vir Lua, ’n rabbedoe van ’n meisiekind, het hy ’n erge wipneus geteken en bene wat nie altyd weet watter kant toe nie, tipies van die voor-tienerstadium.

In ander gevalle sal hy besondere woeste hare of ’n te groot kop skets, ’n krokodil met ’n laaaang bek, ’n olifant kleiner as almal. Dié eienskappe is nie net vir lesers ’n plesier nie, Key kan hom self aan die karakters verkneukel wanneer hulle lyk soos hy dit in sy geestesoog gesien het. Dit is vir hom hoogtepunte in sy loopbaan, sê hy, om binnepret te hê oor ’n skets van ’n karakter wat hom geval.

Nadat hy die boek gelees het wat hy moet illustreer, sal hy besluit op ’n gesig met ’n persona, soos ’n stout kind, vir wie hy byvoorbeeld ’n siniese glimlag sal gee.

“Soms meld die karakters hulle by my aan, veral as dit ’n argetipe soos ’n oupa is, ander kere moet hulle ontwikkel.”

“In animasie is daar ’n templaat van gebare en gesigsuitdrukkings, maar ek gebruik dit nie. Ek soek altyd na iets anders, iets wat geloofwaardig is, menslik is, en sal dikwels op uitdrukking en emosie fokus.”

Die illustreerder Theodore Key.

Hy put die meeste van sy inspirasie uit die natuur en hou veral diere se gedrag dop. Mense ook. En keer op keer is dit die humoristiese insidente wat sy aandag trek. “Ek hou van droë humor en probeer hard om my illustrasies so kostelik as moontlik voor te stel.”

Noudat Key kinderboeke en volwasse boeke geïllustreer het, redaksionele illustrasies verskaf het en ’n uitstalling van sy skilderkuns gehou het, wil hy leer om self verhale te skryf wat hy self kan illustreer.

Dié Kapenaar het grafiese ontwerp aan die Universiteit van Pretoria studeer, maar niks daarvan gehou nie. Hy kon nie wag dat die klasse smiddae moet klaarmaak nie sodat hy saans strokiesprente kon teken, waarvan mense destyds kennis geneem het.

Voordat hy sy loopbaan behoorlik aan die gang kon kry, is hy vir ’n paar jaar Nieu-Seeland toe. In 2011 het hy teruggekeer, Gauteng vir die Kaap verruil en nie weer teruggekyk nie.

Sosiale media en die internet is sy beste advertensiemedium. Hy plaas gereeld sy werk daarop en dié wat daarin belang stel, kontak hom.

Key het ook die 12 boeke in die Jasper-reeks vir kinders geïllustreer. Die skrywer is CF Beyers-Boshoff.

Kassie

Lua Verwey-reeks

Lua is nie soos enige meisie wat jy ken nie. Sy sal eerder tyd op haar J-board deurbring as voor ’n spieël of die TV. Sy’s ook allergies vir seuns, wat vreemd is, want sy het drie boeties én sy wil graag krieket speel, al sal sy die enigste meisie wees.

Maar die krieketspan gaan see toe toer en sy kort beslis ’n vakansie weg van haar mal gesin.

Twee Lua-boeke is al gepubliseer, Wilder as die wildtuin en ’n Plaas se geraas. Human&Rousseau is die uitgewer.

Dihanna Taute, die skrywer van die reeks en gebore in Welkom, is in 2017 in Namibië met ’n ATKV-Woordveertjie vereer. Sy het onlangs met haar man en vier kinders na Nieu-Seeland verhuis.Taute en Key deel die MER-prysgeld van R35 000.

Kassie

Hasie van fluweel

In die klassieke kinderverhaal oor die mag van liefde, die behoefte om iewers tuis te hoort en die teer, verbeeldingryke verhouding tussen ’n kind en sy speelding, vind die hasie uit wat dit werklik beteken om “Rêrigwaar” te wees.

The Velveteen Rabbit deur Margery Williams het in 1922 die eerste keer verskyn. Linda Rode het dit in Afrikaans vertaal en verwerk en Theodore Key het dit geïllustreer.

Die hasie van fluweel sal van 20 Oktober op die rakke wees.

Meer oor:  Boeke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.