Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Marita: Elke boek is ’n dubbele geskenk

Dit het begin met ’n boek met ’n geel omslag, die skrywer se naam in rooi, die titel in swart – Griet skryf ’n sprokie. Mariana Malan blaai saam met Marita van der Vyver deur ’n plakboek waarin ’n paar van haar herinneringe opgeteken is.

Vir Marita van der Vyver is daar vele hoogtepunte in haar loopbaan, maar een van die mees onlangse het te doen met haar gesin wat ’n boekbekendstelling kon bywoon.

Marita van der Vyver

“Met die bekendstelling van Misverstand laas jaar in Kaapstad, was dit die heel eerste keer dat my kinders een van my boekbekendstellings kon bywoon. Of in elk geval die eerste keer wat hulle sal onthou, want Daniel was as baba by die bekendstelling van Griet skryf ’n sprokie, maar dié keer was drie van my en Alain se vier kinders uit Frankryk daar, en dit was baie spesiaal om dié deel van my lewe ook met hulle te deel.”

Dis egter ook vir haar ’n hoogtepunt wanneer ’n leser dankie sê vir ’n boek.

“Elke keer as ’n leser vir my diep uit die hart dankie sê omdat een van my romans hom of haar op ’n persoonlike manier geraak het, onthou ek weer waarom ek stories skryf en waarom ek sal aanhou skryf, ondanks die lang eensame ure voor ’n rekenaar en die frustrasie om iets gesê te kry wat eintlik nie gesê kan word nie.”

Misverstand is verlede jaar bekend gestel.

Elke boek wat sy skryf lê haar na aan die hart en sy glo dat elke nuwe boek waaraan sy werk haar beste is.

“As ek nie opreg glo dat ek besig is om my beste boek te skryf nie, kan ek net sowel ophou skryf,” meen sy.

Die dinge van ’n kind het ’n besonderse plek in haar hart omdat dit haar tweede volwasse roman is.

“Dis bitter moeilik om ’n tweede boek te skryf as jou eerste een se sukses jou wildste drome oortref het. Dis soos ’n skaam tweede kind wat in die skaduwee van ’n voorbarige ousus moes grootword – en as ma wil jy altyd die kinders in die skaduwee beskerm.”

’n Mens wonder watter letterkundige pryse vir haar die meeste in haar loopbaan beteken het en sy verras met haar antwoord:

“Toe ek in 1975 in matriek was, het ek ’n landwye digkunswedstryd gewen en die eerste prys was ’n studiebeurs van drie jaar (wat na vier jaar verleng is) by die universiteit van my keuse. Dit was om die Eeufees van die Afrikaanse taal te vier en die borge was ironies genoeg nie ’n groot Afrikaanse maatskappy soos jy sou verwag nie, maar ’n Engels-Joodse onderneming, Tastic Rice. Dit was die eerste keer dat ek besef het dat ek dalk genoeg talent het om eendag ’n ‘regte skrywer’ te word.”

Marita van der Vyver tree gereeld as spreker op.

Van der Vyver werk tans aan ’n roman wat “begin by die grensoorlog van die jare sewentig, spesifiek die geheime oorlog in Angola, en dit gaan oor die gevolge wat dekades later steeds uitkring wanneer die vroulike hoofkarakter na Kuba reis om sin te probeer maak van die Kubaanse betrokkenheid destyds in Angola”.

“Die voorlopige titel is Grensgeval (hoewel hierdie heerlike titel reeds in die Afrikaanse letterkunde gebruik is). Ek dink daaraan as Grensliteratuur uit ’n vroulike oogpunt, en ek bedoel ‘grens’ ook in die betekenis van huil, want ons vroue is heeltemal uitgesluit uit die macho grensoorlog én uit die macho grensliteratuur wat dit opgelewer het, maar ons sit vandag nog met die mans, broers, minnaars, pa’s wat onherroeplik beskadig is in daardie oorlog.”

Die roman wat vir Van der Vyver op pad na bekendheid geplaas het.

*Griet skryf ’n sprokie was in 1992 ’n blitsverkoper en literêre sensasie. Dis bekroon met drie van die mees gesogte literêre pryse in Suid-Afrika: die M-Net, die ATKV en die Eugène Marais. Sy is voltyds skrywer en uit haar pen het romans, kortverhale, twee versamelings van humoristiese essays, prenteboeke vir kleuters en rubrieke in koerante en tydskrifte gevloei. Haar volwasse romans word deurgaans in Engels, Hollands en Duits vertaal. Griet skryf ’n sprokie was die eerste Afrikaanse roman wat in Chinees vertaal is en is ook in Yslands vertaal. Haar romans Die ongelooflike avonture van Hanna Hoekom en Dis koue kos, skat, is verfilm. Sy woon in Frankryk saam met haar man en gesin.

Vars nuus:

*Van der Vyver bring in Oktober vanjaar 'n memoires-bundel met haar rubrieke en essays (Retoer: Pretoria - Provence) by Lapa uit.

*'n Heruitgawe van haar roman Wegkomkans gaan voor die einde van die jaar by Protea verskyn. Volgende jaar is dit 20 jaar sedert die eerste verskyning van dié roman en sy het 'n nuwe slotwoord vir 'n nuwe generasie lesers geskryf.



MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.