Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Nederland druk nie meer Elisabeth Eybers-werke
Elisabeth Eybers Foto: Argief

Die Nederlandse uitgewer Querido sal die gevierde Afrikaanse digteres Elisabeth Eybers se werk voortaan net as e-boek uitreik.

Volgens Gaia Cerpac, ’n assistent by die uitgewer, gee Querido reeds sedert 1963 Eybers-werke soos Winter-surplus, Bestand, Einder, Kruis of munt, Noodluik, Onderdak, Respyt én haar versamelde gedigte uit, maar sê ’n gebrek aan belangstelling het die skuif na slegs e-boeke gedwing.

“Die stap is weens geringe verkope geneem, wat dit onmoontlik maak om (Eybers se) boeke in druk te hou,” sê Cerpac.

Annemarié van Niekerk, Nederlandse letterkundige, sê die skuif sal beslis ’n impak op die sigbaarheid van Eybers se werk in Nederland hê.

“Dit beteken haar boeke sal nie meer op winkelrakke staan nie, mense sal dit nie meer in die verbyloop toevallig sien nie, en as jy daarna gaan soek, sal jy dit nie kry nie. Dit sal ook nie meer in uitgewerskatalogusse se ‘herdruk’-afdeling verskyn nie.

“Dit is hartseer – veral in die lig dat Eybers een van die groot Afrikaanse digters is, dat sy as Afrikaanse digteres ook in Nederland bekend was, en dat die Nederlandse letterkunde haar selfs as ‘hul eie’ toegeëien het. Sy het in 1978 die Constantijn Huygensprys vir haar hele oeuvre ontvang en in 1991 die P.C. Hooft-prys – die grootste Nederlandse letterkundeprys.”

Van Niekerk wys tog daarop dat Querido in alle waarskynlikheid die stap gedoen het juis omdat daar in Nederland geen aanvraag vir Eybers se werk is nie.

Dit is hartseer – veral in die lig dat Eybers een van die groot Afrikaanse digters is, dat sy as Afrikaanse digteres ook in Nederland bekend was, en dat die Nederlandse letterkunde haar selfs as ‘hul eie’ toegeëien het.
Annemarié van Niekerk, letterkundige

“Dit is dus nie die geval dat ’n lopende kraan toegedraai word nie – die kraan loop in elk geval nie meer nie – en dit is in Nederland nie ’n vreemde toedrag van sake nie. As ’n skrywer so 10 tot 20 jaar oorlede is (Eybers is in 2007 dood), verval hy of sy maklik in vergetelheid, ook die groot Nederlandse skrywers en digters. Dis pynlik, maar dit is die werklikheid hier.

“Die voortdurende stroom nuwe stemme verdring ook die ou stemme,” sê sy.

Prof. Joan Hambidge, digter en letterkundige wat die Hofmeyr-leerstoel aan die Universiteit van Kaapstad beklee, doseer Eybers se werk nog voorgraads en nagraads, ook in slypskole, maar sê die prentjie lyk in die geheel nie beter in Suid-Afrika nie.

“Sy (Eybers) is helaas net in tweedehandse boekwinkels beskikbaar en ’n mens kan haar raaklees in Fanie Olivier se Die mooiste Afrikaanse liefdesgedigte.

“Dit is jammer dat sy nou na e-druk versend word. NB-uitgewers moet haar asseblief weer uitgee – al is dit in sagteband!”

Meer oor:  Joan Hambidge  |  Boeke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.