Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Nuut op die rak: Tolkien meer leesbaar

Van dié drie vertaalde boeke kan ’n mens gerus kennis neem.

Is Kobus Geldenhuys Suid-Afrika se bedrywigste vertaler? Die twee torings, sy Afrikaanse vertaling van die tweede deel van J.R.R. Tolkien se ikoniese Die heerser van die ringe-trilogie, het pas verskyn. Dié drieluik loop ten einde in die oorrompelende hoogtepunt Die koning keer terug, wat ook deur Geldenhuys vertaal is en oor ’n paar maande beskikbaar sal wees.

Tolkien was self baie krities oor die vertaling van sy werk en het byvoorbeeld in ’n brief aan sy uitgewer oor die Nederlandse vertaling geskryf: “That this is an ‘imaginary’ world does not give [the translator] any right to remodel it according to his fancy, even if he could in a few months create a new coherent structure which it took me years to work out.”

Volgens die uitgewer maak die Afrikaanse vertaling Tolkien se relatief komplekse werk beslis leesbaarder en meer verstaanbaar vir ’n jonger fantasiegehoor. Uitgewer: Protea Boekhuis. Prys: R285.

  • Geldenhuys het sowaar ook die Éngelse vertaling van Marita van der Vyver se jeugroman Al wat ek weet (2016) behartig. All I know word beskryf as ’n eg Suid-Afrikaanse verhaal oor ’n sukkelende pa-en-seun-verhouding en die helende krag van woorde. Dit is destyds aangewys as naaswenner in Lapa se jeugromankompetisie en het in 2017 koning gekraai in die fliekkategorie by die kykNET-Rapportpryse. In die roman verdiep die 15-jarige hoofkarakter, Gabriel, hom in die wêreld van performance digkuns waar jy jou woede in woorde kan omsit en dit soos gloeiende kole vir ’n gehoor kan uitgooi. Dan ontmoet hy die beeldskone Sasha wat ook ’n ding of drie van poësie weet. Uitgewer: Lapa. Prys: R200.
  • Liefhebbers van wêreldliteratuur, veral dié met ’n belangstelling in die huidige immigrasieproblematiek in Europa, moet kennis neem van Die mooiste meisie van Genua, Fanie Olivier se Afrikaanse vertaling van La Superba, die roman waarmee die Nederlandse skrywer Ilja Leonard Pfeijffer in 2014 die gesogte Libris-literatuurprys gewen het. Dit is reeds in Engels, Duits en Arabies vertaal. Migrasie is die hooftema in dié outobiografiese roman waarin die lot van ’n immigrant uit Noord-Europa gekontrasteer word met die lotsbestemming van die arm en ontnugterde immigrante uit Afrika wat sukkel om kop bo water te hou. Net soos die ander immigrante raak Ilja verlore in die fantasie wat hy rondom die stad optower . . . met ver­bys­terende gevolge. Uitgewer: Protea Boekhuis. Prys: R295.
Doen aansoek vir die Van Ewijck-prys

Aansoeke vir die Van Ewijck-stigting se prestasieprys ter waarde van R75 000 sluit op 25 November. Die prys, wat in die verlede toegeken is aan die akademikus prof. Ena Jansen, die uitgewer dr. Nicol Stassen en die vertaler dr. Daniel Hugo, is vir bewese prestasies wat reeds gelewer is en verband hou met die doelstellings van die stigting wat kulturele uitwisseling tussen Suid-Afrika en Nederland in die ruimste sin bevorder.

Dit is die afgelope jaar toegeken aan prof. Gerrit Schutte wie se boek Hendrik Swellengrebel in Afrika: Joernalen van Drie Reizen in 1776-1777 onlangs deur die Van Riebeeck Vereniging uitgegee is.

Aansoeke vir geldelike steun vir toepaslike inisiatiewe en prestasies in alle vertakkinge van die kunste of wetenskap moet voor 25 November gerig word aan: Die sekretaris, Van Ewijck-stigting, Posbus 1658, Kaapstad 8000.

* Meer inligting: 021 939 4009, sakkie@sakkiefam.co.za of besoek
ewijckfoundation.co.za

    MyStem: Het jy meer op die hart?

    Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

    Ons kommentaarbeleid

    Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

    Stemme

    Hallo, jy moet ingeteken wees of registreer om artikels te lees.