Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Nuwe apps vir kinders se koppe

Kinder- en jeugboek-­skrywers is produktiewer as ooit tevore. Lona Gericke kies ’n klompie.

Al wat ek weet deur Marita van der Vyver. Uitgewer: Lapa. Prys: R160.

“Ek’s dazed and confused, ek’s naar en deurmekaar dis al wat ek weet, dis swaar en dis waar.”

Gabriel, die 15-jarige verteller, hou van lirieke skryf vir rapliedjies. Hy is ’n alleenkind – sy ma is oorlede, sy pa in ’n inrigting ná haar dood en sy beste vriend is Robert McLachlan, ’n begaafde ou.

Hy bly by sy ouma Lenie (“sy freak my uit, sy’s soos ’n time traveller uit die verre verlede”) en selfone en die internet bly vir haar ’n duister wêreld.

Vrydagmiddae het hy ’n gereelde afspraak met die kopdokter Diana. Met die Vrydagbesoek ontmoet hy Sasha – “Sneeuwitjie met ’n edge”. Soos hy het sy emo­sionele issues.

Al wat ek weet is ’n goed gebalanseerde verhaal wat nie oordrewe emosioneel is nie. Die hoofkarakters groei tot groter volwassenheid; die raprympies spreek boekdele en weerspieël Gabriel se emosies.

Die boek was die naaswenner in Lapa se jeugromankompetisie en Van der Vyver skryf onderhoudend.

Kaptein Verdwyn deur Fanie Viljoen. ­Uitgewer: Lapa. Prys: R90.

Kyle se nuwe selfoon “lyk soos iets wat ’n superheld sal gebruik om na ’n ander ­planeet te bel”. Hy kan nie wag om dit by die skool vir sy beste maat, Adam, te wys nie. Maar soos gewoonlik is Denzel die draak op die toneel om die foon te ­probeer afneem.

Dan ontdek Kyle vir Skoert. Dit is die eerste onsigbaarheids-app. Kyle maak sy suster onsigbaar en ook Pantoffel die hond. As Kaptein Verdwyn is dit sy kans om Denzel terug te kry!

Die boek verduidelik hoekom boelies so optree en gee raad oor wat jy kan doen.

Om ’n selfoon te gebruik as die instrument waardeur Kyle sy vyand ’n les leer, is oorspronklik en jong kinders sal dadelik kan identifiseer met die verhaal.

Die groot Klein Kaptein deur Paul Biegel. Uitgewer: Protea. Prys: R295

In die 1970’s het hierdie klassieke werk as drie individuele publikasies verskyn – en nou is dit in een pragtige boek gevoeg.

Die Klein Kaptein woon in ’n boot. Hy moet sy boot, die Nooitlek, weer vaarbaar maak om die reis na die Eiland van Groot en Groei te begin. Die kinders in die hawedorpie help hiermee, en Dimi, Dik Druif en Marinka en Bang Tonie word sy metgeselle op die vele avonture.

Dit is ’n fees van fantasie met kleurryke karakters en verbeeldingryke situasies wat ure van vermaak gaan verskaf.

Die teks word aangevul met ongeloof­like illustrasies deur Carl Hollander. Hierdie is ’n fantasiewêreld waarin kinders wat lief is vir lees weer en weer ’n nuwe avontuur kan beleef. Dit is vertaal deur Daniel Hugo.

Die musiek van Afrika deur Wendy Hartmann, geïlllustreer deur Joan Rankin. ­Uitgewer: Jacana. Prys: R120.

“Uit ’n rietfluit se pypie sypel ons liriek op die maat van die Afrika-luit se musiek.”

Hierdie pragtige prenteboek is die resultaat van die samewerking deur twee ervare kinderboekskeppers. Die skrywer gee gestalte aan die musiek van Afrika, die geluid van krieke, torre, paddas, knetterende vure, donderende hoewe, die voëls in die lug die ritselende wind, ’n padda wat sing vir die maan . . .

Joan Rankin se fyn waterverfillustrasies vul die lieflike poëtiese teks aan. Waarlik ’n baie spesiale boek; die musikale teks sal tog te lekker voorlees! Hoogs aanbeveel.

Timmertak se nuwe avonture deur Peet ­Ellison, in Afrikaans vertaal deur Kobus Geldenhuys. Uitgewer: Human & Rousseau. Prys: R180.

Timmertak is ’n gewilde karakter in die bekende Storieman-reeks, en hier kry kinders vier nuwe avonture met Timmertak en Abigael die towerspinnekop wat in sy hoed bly. Haar hoedhuisie is vol hare, en die towerspreuk om die hare te laat verdwyn, loop lelik skeef toe Timmertak se wenkbroue verdwyn. Timmertak kry ook te doen met ’n vlooisirkus en die vlooie weet hoe om selfs Ouma Kwas te laat jeuk.

In die laaste storie verdwaal Skitterkind, ’n babaster, en beland in die dam. As sy nie gou gered word nie, sal haar liggie ­altyd uitgedoof word.

Die boek sluit ’n CD in. Wonderlik verbeeldingryke stories met die interessantste karakters en name wat dit ’n uiters gewilde boek gaan maak.

Lotta se lewe: Vent of vriend? deur Alice Pantermüller en Daniela Kohl, in Afrikaans vertaal deur Kobus Geldenhuys. Uitgewer: Human & Rousseau. Prys: R140

Lotta, Chantelle en Paul besoek die stad se swembad sodat dit nog ’n bietjie na ­vakansie kan voel, want die skool het weer begin. Hier spat sy per ongeluk ’n vreemde seun nat wat ’n onverstaanbare taal praat. Paul sê dit is Frans.

En toe is hy nog die nuwe seun in die skool. Rémi moet langs haar sit, en Lotta kan nie die reuk van sy aaklige vrot kaas uitstaan nie. Die ergste is dat hy sommer gou smoorverlief op haar is.

Weer is daar die gebruiklike humor versterk met die sketse, letters in verskillende groottes en emosies wat duidelik op hul gesigte uitgebeeld word.

Gaan hy ’n lid van hul bende word? En sal hy tog leer sy is nie Lothar nie, maar Lotta. Flippit!

Meer oor:  Apps
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.