Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Ongure figure uit van die ergste tye

Doodsbleek

Philip Kerr

JONATHAN BALL, R250

In die warm Berlynse somer van 1938, terwyl diktators en ander politici die wêreld van ’n verwoestende oorlog probeer red met samesprekings in München, het Bernie Günther ’n paar probleme van sy eie.

Dié hardgebakte private speurder moet onder meer besluit of hy weer ’n lid van die Kripo, Berlyn se misdaadpolisie, moet word om ’n reeksmoordenaar vas te trek wat jong Ariese meisies wreed om die lewe bring in wat lyk soos “rituele Joodse moorde” wat Nazi-propaganda van destyds as die waarheid probeer verkwansel het.

Natuurlik stem Günther in om as ’n amptenaar van Adolf Hitler se Derde Ryk na die moordenaar(s) te soek.

Dit is nie net ’n uitdaging wat hy nie kan weerstaan nie, hy wil ook keer dat nuus oor die moorde lei tot gewelddadige optrede teen Berlyn se reeds bedreigde en beleërde Joodse bevolking.

Dit is, in breë trekke, waaroor die tweede Afrikaanse vertaling van Philip Kerr se Berlynse Noir-trilogie gaan.

Maar soos in Hans-Nazi’s, die eerste vertaling van ’n Kerr-roman in Afrikaans, is dinge nie só eenvoudig nie.

Günther, ’n man wat die Nazi’s nie juis kan verdra nie en Hitler se Mein Kampf gebruik om sy badkamervenster oop te hou, bevind hom immers in een van die ergste diktature in die geskiedenis van die mensdom.

En hy kry weer met ’n reeks ongure historiese figure uit dié tyd te doen: Heinrich Himmler, Reinhard Heydrich, Otto Rahn en Karl Maria Weisthor.

Die afstootlike anti-Semitiese pornograaf Julius Streicher maak ook ’n kortstondige verskyning in sy besope arrogansie by ’n restaurant in Neurenberg wanneer Günther in dié stad aandoen in sy soeke na die moordenaar(s).

Günther se soeke lei hom tot in die hoogste kringe van Himmler se SS waar allerhande kultiese fabels wat deur mense soos Weisthor uitgedink is, hom konfronteer.

Hy is nog steeds aan die rook en drink, seksisties en selfs homofobies.

Günther is sy ou siniese self in Zirk van den Berg se lekkerlees-vertaling.

Hy is nog steeds aan die rook en drink, seksisties en selfs homofobies.

Die morele dilemma waarmee mense in ’n diktatuur sonder menseregte soos dié van die Nazi’s te doen kry, word ook uitstekend uitgebeeld.

Hoewel hy die Nazi’s en hul wette nie kan verdra nie, misbruik hy dit in sy strewe om ’n soort van geregtigheid te laat geskied.

Kerr (én Van den Berg) laat Günther op ’n keer in dié verband opmerk: “Ek is g’n ridder op ’n wit perd nie. Net ’n ietwat verweerde man in ’n gekreukelde oorjas op ’n straathoek met net ’n vae idee van iets wat jy nou maar net sowel moraliteit kan noem.”

Hans-Nazi’s was verlede jaar ’n aangename lees-verrassing. Doodsbleek is selfs nog beter. En ek gaan sukkel om so lank te wag vir die derde vertaling, Doodslied vir Duitsland, wat eers aanstaande jaar gaan verskyn . . .

Gert van der Westhuizen is die Stemme-redakteur van Netwerk24.

Meer oor:  Gert Van Der Westhuizen  |  Boeke  |  Resensies
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.