Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
SA digter-vertaler sterf
Charl J.F. Cilliers

Die digter en vertaler Charl J.F. Cilliers, wat voorheen die hoof van die parlement se vertaalburo was, is Dinsdag dood.

Hy was 78 en het in Yzerfontein in die Wes-Kaap gewoon.

Hy het aan diabetes gely en hy was die afgelope tyd bedlêend, sê Dorothy Badenhorst, ’n vriendin.

“Behalwe dat hy vantevore ’n rugoperasie gehad het, het hy ook ’n bloedklont deur die long gekry.”

Cilliers, wat hoofsaaklik in Engels gedig het, se debuutbundel West-Falling Light is in 1971 deur Tafelberg uitgereik. Sy tweede bundel, Has Winter No Wisdom, is in 1979 deur Maskew Miller uitgereik. Hy moes later self sy werk uitgee.

Die digter en akademikus prof. Joan Hambidge beskryf sy poësie as een van die wonderlikste ontdekkings van haar lewe.

“ ’n Engelse digter met ’n Afrikaanse naam,” sê Hambidge.

“My mentor, wyle Henning Snyman, het met my akkoord gegaan: Hier is ’n digter van formaat. Oor sy versamelde gedigte het Snyman op die agterblad geskryf: ‘Die eenvoud van die bundel kan misleidend wees, want hierdie eenvoud van woord en struktuur word gelaai met van die allermooiste metafisiese verse in die Suid-Afrikaanse letterkunde’.”

Cilliers het onder meer haikoes op LitNet gepubliseer en ’n kinderbundel, Fireflies Facing the Moon, het in 2008 verskyn. Daar was ook ander publikasies uit sy pen.

“Ons het vriende geword en elke Sondagoggend sou ek hom bel om te hoor hoe dit gaan,” sê Hambidge.

“Gereeld sou ek resensies aanstuur vir hom waar hy aan die Weskus gewoon het. ’n Jaar gelede het hy ernstig siek geword en dikwels kon hy nie die foon antwoord nie.

Ná ’n reis het hy my vertel hy is in die hospitaal en ek was bekommerd. Gelukkig is hy ontslaan. Gister vra (die digter) Johann de Lange ook: Hoe gaan dit met Charl?

Vanoggend (Woensdag) bel ek, maar niemand antwoord nie.”

Cilliers het ook die vertalings van Hambidge se bundels Lot se vrou en Meditasies gedoen.

“Ek sou graag wou noem dat sy vertalings van my werk ook in ’n Nederlandse bloemlesing opgeneem is.”

Marlise Joubert, Charl Cilliers
In a Burning Sea, 'n bloemlesing van Afrikaanse gedigte wat in Engelse vertaal is.

Hy was saam met die digter Marlise Joubert ’n medewerker aan die bundel In a Burning Sea, ’n bloemlesing van Afrikaanse gedigte wat in Engels vertaal is.

“Hy was werklik myns insiens een van ons heel beste vertalers,” sê Joubert.

“Toe hy die bundel A Momentary Stay gepubliseer het, het hy my gevra om die omslagontwerp te doen. Hy wou ’n eenvoudige waterverfsketsie hê van ’n appeltakkie. Uit ’n klompie waterverftekeninge wat ek gemaak het, het hy een gekies. Ek was baie bly dat hy toe een van die ontwerpe gebruik het vir sy bundel!”

Joubert onthou sy liefde vir fotografie.

“Sy huis hang vol foto’s van pragtige tonele wat hy oor die jare afgeneem het. Dan was daar ook sy liefde vir diere, veral sy Yorkie-hondjie, en vetplante – sy hele voortuin vol. Hy het ’n ongelooflike kennis van klassieke musiek gehad – iets wat hy en my man Louis (Esterhuizen, die digter) gedeel het. Hy was ’n digtersvriend, ’n nederige dog verrykende mens en om hom te kon ken, was net ’n voorreg.”

Cilliers word deur twee seuns en twee kleindogters oorleef.

Meer oor:  Tafelberg  |  Poësie  |  Joan Hambidge  |  Digter  |  Nb-Uitgewers
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.