Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
SA en Göteborg-boekeskou neem vir 3 jaar hande

’n Gesprek tussen Nathi Mthethwa, minister van sport, kuns en kultuur, en sy Sweedse eweknie, Amanda Lind, is opgevolg deur die aankondiging dat Suid-Afrika en die Göteborg-boekeskou in Swede ’n vennootskap van drie jaar aangegaan het.

Nathi Mthethwa, minister van sport, kuns en kultuur. Foto: Getty Images

Mthethwa en Lind het leeskulture in veeltalige lande in ’n aanlyn seminaar op 25 September bespreek. Dié gesprek het saamgeval met Suid-Afrika – ook Suid-Afrikaanse skrywers en letterkunde – wat tussen 24 en 27 September die eregas by die boekeskou sou wees, voordat dit ook weens die pandemie ontspoor is.

“Die Göteburg-boekeskou en Suid-Afrika het toe ooreengekom dat die beste pad vorentoe ’n belegging in drie stappe moet wees,” sê Charlotta Parkas, woordvoerder van die boekeskou, aan Netwerk24.

“In 2021 sal Suid-Afrika deelneem as ’n tentoonsteller (op die skou). In 2022 sal Suid-Afrika (weer) die Göteburg-boekeskou se eregas wees. In 2023 sal Suid-Afrika aan die skou deelneem en fokus op letterkunde vir kinders en jong volwassenes.”

Parkas sê die doel van dié samewerking is onder meer om bywoners van Skandinawië se grootste boekeskou die geleentheid te gun om “fantastiese letterkunde en poësie vanuit Suid-Afrika” te ervaar en te ontdek.

Meer inligting oor die vennootskap, wat amptelik ’n “veeljarige inisiatief” heet, is nog nie bekend nie.

In 2021 sal Suid-Afrika deelneem as ’n tentoonsteller (op die skou). In 2022 sal Suid-Afrika (weer) die Göteburg-boekeskou se eregas wees. In 2023 sal Suid-Afrika aan die skou deelneem en fokus op letterkunde vir kinders en jong volwassenes.
Charlotta Parkas

Frida Edman, die boekeskou se hoof, sê in ’n mediaverklaring sy voel “ongelooflik bevoorreg” om vir die volgende paar jaar met Suid-Afrika saam te werk.

“Suid-Afrikaanse letterkunde het so baie eienskappe! Dit is geskiedenis, hoop, poësie, die toekoms, en fiksie. My hoop is dat Suid-Afrikaanse letterkunde volop in Swede sal wees – dat baie meer boeke vertaal sal word en lesers se oë op jong (skrywers) en nuwe publikasies van Suid-Afrika gevestig sal word, maar dat ons ook van Suid-Afrika se grootste outeurs sal ontmoet.”

Mthethwa het ’n soortgelyke wens in die mediaverklaring uitgespreek.

“Ons bevestig hiermee die sterk band tussen die twee lande en hul mense. Hierdie inisiatief gaan internasionale samewerking versterk en help om taal-, diversiteits-, boeke-, uitgewers- en leesprojekte wat tot albei partye se voordeel is, te ontwikkel.”

Suid-Afrika se deelname aan die jaarlikse fees word deur die Nasionale Biblioteek van Suid-Afrika bestuur. Die departement van sport, kuns en kultuur is ’n finansiële vennoot in dié deelname.

Die Göteburg-boekeskou sal volgende jaar van 23 tot 26 September aangebied word.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.