Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Skryf nou in vir Woordfees se bundel
Bly, die US Woordfees se kortverhaalbundel in 2016.

Inskrywings is nou oop vir die vyfde Toyota US Woordfees-kortverhaalbundel.

Skrywers wie se verhale vir die bundel gekies word se name sal met die US Woordfees se programbekendstelling in November bekend gemaak word.

Soos vanjaar sal een van die verhale in die 2020-bundel gekies word om as kortrolprent deur kykNET vir die Silwerskermfees verwerk te word.

Die wenverhaal en die verhaal wat vir ’n verwerking tot kortrolprent gekies is, sal eers aangekondig word tydens die bekendstelling van die bundel by die US Woordfees wat van 6 tot 15 Maart in Stellenbosch aangebied word.

Die wenverhaal is nie noodwendig die verhaal wat vir rolprentverwerking gekies word nie. Verskillende kriteria geld.

Die bundel word in ’n beperkte oplaag uitgegee wat aanvanklik slegs by die US Woordfees te koop sal wees. Indien enige eksemplare oorbly, sal dit by enkele uitgesoekte boekwinkels beskikbaar gestel word en weer op die volgende jaar se fees te koop wees.

Die eerste vier bundels is baie goed deur skrywers en die leserspubliek ondersteun en ook gunstig deur kritici ontvang. Hierdie kortverhaalbundels sal in die komende jare dien as ’n dokument van die tydsgees waarin veral Afrikaanssprekende Suid-Afrikaners hulle bevind.

Du Toitskloof Wyne, ’n Woordfees-vennoot, borg weer in 2020 die prysgeld van R30 000 wat aan die skrywer van die wenverhaal toegeken word. Die skrywers wat in dié bundel opgeneem word, sal elkeen R5 000 ontvang.

Du Toitskloof maak ook ’n bydrae tot die prysgeld en borg die bekendstellingsgeleentheid van die kortverhaalbundel, wat by die US Woordfees aangebied sal word.

Kompetisiereëls en riglyne vir inskrywings:

•Slegs Afrikaanse kortverhale sal aanvaar word.

•Die kompetisie is oop vir alle skrywers. Werknemers en familielede van Du Toitskloof Wyne en/of die US Woordfees word nie toegelaat om deel te neem nie.

•Slegs een inskrywing van 1 500 tot 3 000 woorde word per skrywer aanvaar.

•Verhale moet nuutgeskryf wees en nie voorheen op enige platform gepubliseer wees nie.

•Die skrywers wie se verhale in die bundel opgeneem word, sal elkeen ’n eenmalige betaling van R5 000 teen April 2020 ontvang.

•Daar sal ongeveer 25 verhale in die bundel gepubliseer word.

•Die skrywer van die wenverhaal ontvang prysgeld ter waarde van R30 000.

•Kopiereg van die verhale berus by die skrywers, maar kopiereg van die bundel setel in die US Woordfees. Indien verhale wat in die bundel verskyn ook elders gepubliseer word, moet dit geskied met skriftelike kennisgewing aan die US Woordfees sowel as volledige erkenning met publikasie.

•Keuring word streng anoniem gedoen. Die skrywer (en vertaler – sien voorafgaande punt) se naam en kontakbesonderhede moet op die onderstaande inskrywingsvorm ingevul word. Slegs die titel moet op die verhaal verskyn, ten einde anonieme keuring te verseker.

•Verhale moet in 12pt Times New Roman en 1.5-spasiëring in MS Word-formaat aangebied word. Geen PDF’s sal aanvaar word nie. Elke bladsy moet genommer wees met die titel van die verhaal duidelik sigbaar.

•Indien daar enige blatante verwysing na die skrywer in die verhaal gemaak word waaruit beoordelaars sy/haar identiteit kan aflei, sal die verhaal summier gediskwalifiseer word.

•Verhale sal geredigeer word voor publikasie, met goedkeuring daarvan deur die skrywer.

•Hoewel die bundel die feestema as titel sal hê, moet skrywers dit nie as riglyn vir of onderwerp van die verhaal gebruik nie. Die tema van die verhaal word geheel aan die skrywer oorgelaat.

* Die sluitingsdatum vir inskrywings is om 16:00 op 30 September 2019. Stuur inskrywings per e-pos aan Olivia Wollow by fees@sun.ac.za

* Inskrywings wat later as 16:00 op 30 September 2019 ontvang word, sal nie in aanmerking kom nie. Inskrywings sal met ontvangs erken word.

Meer oor:  Stellenbosch
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.