Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Szczurek oorweeg prys ter ere van Brink
Karina M. Szczurek Foto: Jaco Marais

Karina M. Szczurek, die Poolse skrywer en weduwee van die skrywer André P. Brink, beoog om ’n letterkundeprys ter ere van haar man in te stel met die tantième van die bundel van hul liefdesbriewe, You Make Me Possible.

Brink wat in 2015 op 79 dood is, het talle jong skrywers aangemoedig en dít is onder meer waaraan Szczurek wil erkenning gee.

“Hy het my ook aangemoedig. Dit moes my in die gesig staar dat dit is wat ek in die wêreld wou wees en wat ek met my lewe wou doen. In ons korrespondensie (in die boek) het hy my ook aangemoedig. Hy het dit met baie ander mense ook gedoen. Hy het ’n gawe gehad om mense aan te moedig om te skryf en te laat publiseer.”

’n Skrywer wat op die rand van ’n literêre deurbraak is, moet vir die prys in aanmerking kom.

“Ek is nog nie 100% seker nie, maar die prys sal moontlik nie André se naam dra nie. Ek dink daaraan om dit te vernoem na ’n bekende karakter van hom, een wat ek weet vir hom ook baie sou beteken het.”

Benewens haar biografiese boek, The Fifth Mrs Brink, wat in 2017 uitgereik is, is die roman Invisible Others: A Novel ook deel van Szczurek se oeuvre. Sy was ook betrokke by Vlam in die sneeu/Flame in the Snow, wat bestaan uit die briewe tussen Brink en die digter Ingrid Jonker.

You Make Me Possible, ’n bundel briewe tussen Karina M. Szczurek en André P. Brink.

You Make Me Possible bestaan uit korrespondensie van November 2004 tot Maart 2005.

Szczurek het Brink die eerste keer op die lughawe in Wene ontmoet.

Sy het geweet van hom en het al van sy boeke gelees, maar ’n verrassing het op haar gewag.

“Ek het op daardie stadium nie baie persoonlikhede geken nie. Ek het hulle altyd as mitiese skepsels gesien, en ek het geweet André was 69. Ek het geen verwagting gehad nie. Maar toe hy aanland, het ek gedink wow . . . wat ’n merkwaardige, jeugdige, energieke mens.”

Hulle het aanklank gevind by mekaar en Brink het vir haar ’n eksemplaar van sy boek Before I Forget (vertaling van Voor ek vergeet) gegee.

Daar was vroeg ’n wedersydse aanklank. Hulle het mekaar die hof gemaak met woorde, verduidelik Szczurek.

“Ek kry eintlik ’n skok as ek nou weer sommige van daardie briewe lees. Ek dink: ‘Karina?! Hoe dapper en roekeloos was jy’.”

André P. Brink Foto: Karina M. Szczurek

Voordat sy na Kaapstad verhuis het, was daar reeds ongeveer 250 000 woorde se korrespondensie tussen hulle.

Sy gee toe dit is baie persoonlike briewe, maar die bundel skets ’n verhouding wat aanvanklik ietwat van ’n ongunstige wedsyfer gehad het.

“Dit is seldsaam dat daardie soort liefdesverhale tog waar kan word. Dit is ongelooflik om dit met lesers te kan deel. En in ons korrespondensie verskyn die woorde ‘you make me possible’. Ons het besef ons kan dit bewaarheid en dit wás ’n werklikheid. Ek hoop in ’n sekere sin dat die boek ook nou moontlik sou wees om die liefde wat ons albei gevoel het met lesers te deel en te wys dat die onmoontlike soms wel moontlik is.”

*You Make Me Possible word deur Protea uitgegee en kos R230.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.