Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Teatermaker Nico Luwes het nou ook ’n roman op sy kerfstok

Klugte en komedies is nie vir Nico Luwes ’n uitdaging nie. Hy het sowat 35 al die lig laat sien en die meeste boonop self geregisseer. Wat wel ’n uitdaging is en hy vir homself as ’n toets gestel het, is die skryf van ’n roman.

Nico Luwes, afgetrede hoof van die dramadepartement van die Universiteit van die Vrystaat. Foto: Netwerk24

Die toets het hy nie net geslaag nie, dié afgetrede hoof van drama en teaterkuns aan die Universiteit van die Vrystaat het dit gecum. Destiny, wat hy in Engels geskryf het sodat sy “Russiese vriende dit ook kan verstaan”, beslaan ’n hele 500 bladsye en is binne ’n betreklike kort tyd van twee jaar voltooi.

Dit is reeds as e-boek beskikbaar en voor einde vandeesmaand behoort Luwes die werklike boek in sy hand te hou.

“Die verhaal is erg kompleks met baie fiktiewe storielyne en karakters, maar die basis is die plekke wat ek in Rusland besoek het, die mense wat ek ontmoet het en die stories wat my vertel is van spioenasie en verdagmakery wat steeds daar voorkom.”

Maar wat is ’n storieboek sonder romanse en ’n Nico Luwes-verhaal sonder humor.

Saam met die spioene se gekonkel botvier ’n liefdesverhouding, stook Russe onwettig wodka van gesteelde aartappels uit die Kremlin en sit mans in die Almost Underground-kroeg om meisies se bene onder hul minirokke te bekyk.

“Die kroeg bestaan werklik. Sy vensters is op straathoogte en dit is vandaar dat die mans die verbygaande meisies sit en dophou.”

Destiny is in wese ’n ernstige spioenasieverhaal oor kodes wat ná die Tsjernobil-kernramp na die Weste gestuur en ontsyfer word.

Dit begin met die hoofkarakter, Julian Reed, wat sy eerste besoek aan Rusland bring waar hy nie net die skoonheid van die land ontdek nie, maar ook die skone violis Mariana Sobchak in Moskou tot wie hy onmiddellik aangetrokke voel.

Kort ná die kennismaking loop hulle hul in moeilikheid vas. Met die dood van Mariana se oom kry sy ’n boek wat haar pa vir haar nagelaat het en binne-in ’n kriptiese boodskap wat die twee verliefdes op ’n verrassende pad stuur.

Die groot vraag is, is hul lewe werklik in gevaar en sal Mariana Julian kan vergesel wanneer hy na Suid-Afrika moet terugkeer?

Die buiteblad van die akteur, regisseur en skrywer Nico Luwes se eerste roman, Destiny.

Luwes sê sy besoeke aan Rusland en die hou van ’n dagboek het aanleiding gegee tot die roman.

In die 1990’s het hy sy vriend Igor in Moskou gaan besoek en die reis betaal met die Piers Nicholson-prysgeld wat hy vir sy bydrae tot teater in die Vrystaat ontvang het. Dit het meer vrugte afgewerp as net die roman.

Igor Mercoulof, direkteur van ’n operateater in Moskou, het op ’n keer in Bloemfontein vir die destydse Sukovs toneel gespeel en die regie gedoen van Tsjechof se Huweliksaansoek.

Op die besoek aan Rusland het hy alles wat hy gesien en ervaar het, in sy dagboek aangeteken – teaters, skrywershuise, kerke, kore, operas, toneelstukke, gesprekke, mense, name. “Daarna is ek genooi om ’n toneelstuk in die Tsjechof-teater in Pavlodar, Kazakstan, te regisseer.”

Dit klink onmoontlik om ’n drama in ’n vreemde taal te regisseer, maar Luwes sê: “Dis glad nie moeilik nie. As jy die verhaal van Romeo en Juliet ken, weet jy hoe die emosies ingespan moet word.”

Hy is toe ook gevra om een van sy eie komedies daar op te voer, waarvoor hy Die buite-egtelike ouma in Russies laat vertaal en self geregisseer het.

“Ek het besef die Russe het dieselfde humorsin as ons toe die gehoor net so lekker gekraai het van die lag soos hier.”

Luwes se belangstelling in Rusland is gebore uit sy fassinasie met die werk van Tsjechof. Hy sê in Suid-Afrika word Tsjechof se Kersieboord as ’n tragedie opgevoer vanweë die welgestelde familie se ondergang.

“In Rusland is dit ’n seëvierende werk omdat die laerklas-sakeman Lopachin die lui en skuldbelaaide bourgeois-gesin se plaas oorgeneem het. Die uitkap van die kersieboord word boonop as politiek bevrydend beskou, soos ook die opkoms van die werkersklas kort voor die Russiese revolusie.”

Luwes sou vanjaar twee komiese Tsjechof-stukke op die Vrystaat Kunstefees opgevoer het. Toe dit weens Covid-19 deur die mat val, het hy Ou Wyntoon en die weerlose kreatuur en ’n Tragiese kêrel as radiodramas vir RSG verwerk. Die twee klugte met Johann Nel, Esther von Waltsleben, Jan Hendrik Opperman en Luwes self word op 24 September en 1 Oktober net ná die nuus 14:00 uitgesaai.

Destiny is nie die skrywer se laaste roman nie. Teen die einde van Oktober verskyn sy eerste Afrikaanse roman, Die reënboogmaker, wat in die Karoo afspeel.

Nou moet hy nog net ’n klug en tesis vir sy tweede PhD afhandel en daarna lê die tyd braak vir watter genres hy ook al volgende wil beproef.

Destiny kan bestel word as e-boek en ’n gewone boek by die uitgewer De Novoboekhandel by http://www.denovowebs.co.za/product/destiny/.

Meer oor:  Dramaturg  |  Teater  |  Boeke  |  Roman
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.