Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Boeke
Toe nie net wetenskapfiksie

Roman

The Waiting Rooms

Eve Smith

Orenda Books, R90,56

Stel jou ’n wêreld voor waar jy elke dag ’n masker moet dra, antibiotika bykans nutteloos is en die geringste infeksie jou dood kan veroorsaak. Enkele maande gelede sou Eve Smith se debuut soos suiwer wetenskapfiksie gelees het. Vandag is dit ongemaklik na aan ons werklikheid.

Vermanings teen die oormatige gebruik van antibiotika en die toenemende weerstandigheid wat dit meebring, is kwalik nuus. Volgens die Wêreldgesondheidsorganisasie word 700 000 sterftes jaarliks toegeskryf aan bestandheid teen antibiotika en sal dit teen 2050 na raming 10 miljoen bereik.

The Waiting Rooms speel 20 jaar ná die antibiotika-krisis af in ’n wêreld waar jou 70ste verjaardag afsondering en waarskynlik die einde van jou lewe kan beteken. As verpleegster en doodsengel vir bejaardes met geen hoop op herstel nie, beleef Kate Connelly nie net eerstehands die krisis nie, sy staan regstreeks in die spervuur. Ná die afsterwe van haar aanneem-ma stel Kate ondersoek in na haar biologiese ma, ’n vrou met ’n komplekse verlede wat strek van Suid-Afrika 50 jaar tevore.

The Waiting Rooms speel 20 jaar ná die antibiotika-krisis af in ’n wêreld waar jou 70ste verjaardag afsondering en waarskynlik die einde van jou lewe kan beteken.

27 jaar voor die pandemie doen Mary Kate Sommers navorsing vir haar PhD in botanie in Suid-Afrika. Op ’n veld-ekskursie kom sy ’n renoster en Piet Bekker teë.

Tuberkulose is nie meer uitsluitlik Afrika se probleem nie. Dis die vyfde grootste oorsaak van sterftes wêreldwyd en grootskaalse epidemies breek uit in New York, Miami, Rio de Janeiro en Bangkok. Vir Bekker lê die oplossing in tradisionele plantmedisyne, maar hy het die kennis en ondervinding van ’n botanis nodig. Mary en Piet se fisiese en professionele verhouding het verreikende gevolge vir hul toekoms, maar dit het ook ’n wyer impak.

Omstrede stellings deur Franse medici oor toetsing in Afrika is ewe relevant in hierdie alternatiewe tydlyn. Suid-Afrika word Bekker se speelplek vir proefneming met nuwe tuberkulose-medikasie – met onherroeplike nagevolge.

In ons huidige klimaat behoort The Waiting Rooms ontstellende leesstof te wees. Dit is nie. Die distopiese wêreld is oortuigend juis omdat dit op die werklikheid gegrond en feitlik gestaaf is deur grondige navorsing. Net in Suid-Afrika het tuberkulose in 2018 63 000 lewens geëis en virusse soos die een wat Covid-19 veroorsaak, gaan nie oornag verdwyn nie. Ons kan redeneer dat dié net vermaaklike fiksie is, maar die waarheid is ons leef al geruime tyd in ’n brose wêreld. Ons kan nie langer wegkruip agter onkunde se rokpante nie.

The Waiting Rooms kan tog vir ’n paar uur ons aandag aflei en daarin lê fiksie se onskatbare waarde. Dit gee hoop dat daar, soos in Eve Smith se fiktiewe wêreld, steeds die moontlikheid van ’n gelukkige einde bestaan.

Sonja van der Westhuizen is ’n vryskutresensent van Stellenbosch.

Meer oor:  Resensies
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.