Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Flieks
Nuwe ‘Fiddler on the Roof’ word beplan
Chaim Topol as die melkman Tevye in die bekroonde rolprent Fiddler on the Roof. Foto: Jerusalem Report Archives.

Tevye, die ortodokse Russiese Jood in die veel bekroonde musiekspel Fiddler on the Roof, keer vir die eerste keer sedert 1971 terug na die silwerdoek, natuurlik saam met sy vrou, Golde, en hul vyf dogters.

Dié klassieke musiekspel, wat sy buiging in 1964 op Broadway gemaak en nege Tonys gewen het, is ná 3 200 vertonings een van die 20 stukke wat die langste speelvak in die New Yorkse teaterdistrik gehad het.

Die rolprent was net so ’n treffer. Dit is vir agt Oscars benoem en het drie ingepalm, onder meer vir beste prent en beste regie.

Wie sal ooit Chaim Topol se kragtoer as Tevye vergeet? Die vraag is nou, wie gaan Tevye se verslete skoene in die nuwe weergawe volstaan.

Die algemene verwagting is dat die regisseur Thomas Kail op Lin-Manuel Miranda sal besluit. Hulle het voorheen al saam gewerk en heel onlangs in Hamilton, ’n musiekspel waarvan die speelvak onlangs weens die korona-regulasies beëindig is.

Die 40-jarige Miranda is ’n uitsonderlik veelsydige kunstenaar. Hy is komponis, liriekskrywer, sanger, kletsrymer, vervaardiger, dramaturg en akteur, wat veral in die musiekspele In the Heights en Hamilton beïndruk het. In 2016 het hy die Pulitzerprys vir drama ontvang vir Hamilton waarvoor hy die teks, musiek en lirieke geskryf het. Dit is maar die negende keer dat die Pulitzer sedert 1918 vir ’n musiekspel toegeken is.

Die draaiboek vir Fiddler on the Roof is aan Steven Levenson toevertrou. Hy is die skrywer van die musiekspel Dear Evan Hansen, wat ook weens die viruspandemie beëindig moes word.

Fiddler on the Roof is geskep deur Joseph Stein met musiek deur Jerry Bock en lirieke deur Sheldon Harnick. Die verhaal speel af in die imperiale Rusland in 1905 met Tevye wat sy bes doen om die Jode se godsdienstige en kulturele tradisies te handhaaf. Hy loop hom egter vas teen sy dogters wat nie in die tradisie van gereëlde huwelike belang stel nie, hulle wil vir liefde trou.

Die son kom op oor Anatefka, maar gaan helaas ook onder (Sunset, Sunrise), nie net omdat die dogters van die ou tradisie wegbreek nie, maar ook omdat die tsaar ’n edik uitgevaardig het dat die Jode uit Anatefka verwyder moet word.

Dit is nog nie bekend wanneer verfilming sal begin of wanneer die fliek deur MGM uitgereik sal word nie. ­ - Deur Elretha Britz saamgestel uit Jerusalem Post, imdb.com en Screenrant.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.