Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Flieks
Oscars sê nee vir Nigeriese fliek

Die Academy of Motion Picture Arts and Sciences (Ampas), wat jaarliks die gesogte Oscars uitdeel, het Nigerië se inskrywing in die kategorie vir beste internasionale rolprent gediskwalifiseer – weens die rolprent se Engelse draaiboek.

Dié beslissing oor die rolprent Lionheart is volgens die webwerf The Wrap in ’n e-pos aan al die deelnemers in dié kategorie gekommunikeer.

Volgens Ampas se reëls kan rolprente net in dié kategorie ingeskryf word as dit buite die VSA vervaardig is en “hoofsaaklik nie-Engelse dialoog” het.

Lionheart, wat deur die Nigeriese vervaardiger en aktrise Genevieve Nnaji geregisseer is, is 95 minute lank – waarvan 84 minute volgens die webwerf Deadline uit Engelse dialoog bestaan; dit is daarom gediskwalifiseer. Die res van die fliek, wat Nigerië se eerste inskrywing vir die gesogte prys is, is in die Igbo-taal.

Ampas se besluit is wyd gekritiseer, ook deur die Amerikaanse regisseur Ava DuVernay, wat op Twitter daarop gehamer het dat Engels Nigerië se amptelike taal is.

“Gaan julle (Ampas) die land keer om in sy amptelike taal om ’n Oscar mee te ding?” vra DuVernay.

Larry Karaszewski, medevoorsitter van die komitee wat ’n oog hou oor die inskrywings in die kategorie beste internasionale rolprent, het aan Deadline gesê dat die inskrywing moontlik weens ’n “misverstand” was.

Ampas het vroeër vanjaar die naam van die kategorie van “beste rolprent in ’n vreemde taal” na “beste internasionale rolprent” verander. Dié naamsverandering kon volgens Karaszewski die idee geskep het dat enige buitelandse rolprent inskryf kan word – maar dit is nie die geval nie. Die reël oor nie-Engelse dialoog geld steeds.

Die Nigeriese komitee wat Lionheart as hul inskrywing gekies het, het glo aan Bloomberg gesê hulle berus by Ampas se besluit.

“Die komitee sal in die toekoms net rolprente inskryf wat hoofsaaklik in ’n vreemde taal is – nie-Engelse dialoog.”

The Wrap berig dat rolprente van 93 lande vanjaar in die kategorie vir beste internasionale rolprent ingeskryf is, wat ’n rekord is. Die diskwalifisering wis egter dié rekord uit en ewenaar die 92 inskrywings wat in 2017 ontvang is.

Suid-Afrika se inskrywing, Knuckle City, is hoofsaaklik in Xhosa.

’n Kortlys sal in Desember opgestel en die benoemings in Januarie aangekondig word. Die Oscars word op 10 Februarie uitgedeel.

– Saamgestel deur Christiaan Boonzaier met bykomende bronne: www.deadline.com, www.oscars.org, www.thewrap.com

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.