Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Vermaak
Laurinda Hofmeyr se 4de album hier
Laurinda Hofmeyr. Foto: Nina Swart

“Sy laat jou gedig se hele betekenis verander. Dit vang ’n mens onkant.”

Toast Coetzer praat van Laurinda Hofmeyr se toonsetting van sy gedig “Anyway” op haar jongste album Wat ek wou sê.

“Laurinda het die vernuf en talent om woorde wat iemand anders op papier sit ’n lied te laat word. Jy kan dit dan na net soveel meer plekke vat.

“Niemand kan in die verkeer sit en ’n digbundel lees nie, maar jy kan na die radio of ’n CD luister. En net dalk inspireer dit iemand om na die bundel te gaan soek as jy die toonsetting gehoor het,” meen hy.

Sewe jaar ná Reis na die suide is Wat ek wou sê by die pas afgelope Oppikoppi-fees bekend gestel.

“Toe ek sewe jaar gelede by Oppikoppi was, was ek swanger en kon skaars die koppie uitkruip,” vertel Hofmeyr laggend. “Hierdie keer was dit sommer net heerlik.”

En die album is goed ontvang. Al mag mense meen dat Oppikoppi net groot lawaai en harde musiek beteken, is daar tog ’n spesiale lokaal vir “stiller goeters”, soos sy dit beskryf.

Die bekendstelling hier sal waarskynlik beteken dat ’n nuwe gehoor ook Hofmeyr se werk ontdek het. In Oktober beplan sy verskeie konserte.

Sy is nou al bekend vir haar toonsettings van gedigte. Op haar jongste album het sy weer ’n wye verskeidenheid digters se werk vervat.

Daar is van C. Louis Leipoldt se “Sekretarisvoël” uit 1926, N.P van Wyk Louw se “Ons kan nie praat nie” uit 1962 tot by Oloff de Wet se “moya” van 2013.

Gebed

Onse Vader - Gerrit Brand

Jy wat so naby - en tog so ver is,

Laat nou ’n slag van jou hoor.

Dinge is nie soos dit hoort nie;

Niks is soos dit hoort nie.

Sê nou maar ons begin by die basics ...

En moet nou nie ons verlede teen ons hou nie

(ons sal ons nie meer so hoogheilig hou nie).

En doen tog nie so moeilik nie,

Anders is ons in ons maai in.

Ja, hou maar die sakie in jou hande,

En die mag uit ons s’n.

Toe nou.

■ Gerrit Brand (1970-2013) was redakteur van Die Burger se boekeblad. Hierdie is een van twee hedendaagse weergawes van die Onse Vader-gebed deur Brand

Ook Gerrit Brand se een weer­gawe van die “Onse Vader” is getoonset (sien hiernaas).

Coetzer se gedig dateer uit 2001 en hy is bly dat dit ná al die jare nou “ ’n paar nuwe ore bereik.

“Hofmeyr kies gedigte wat in ’n sekere tyd van haar lewe met haar praat. Haar vorige albums is Perd oor die maan (1999), Ligdag (2003) en Reis na die suide (2008).

Hoewel jare verloop het tussen die laaste twee, was sy nooit weg van die verhoog nie. Haar optredes by kunstefeeste en saam met ander kunstenaars trek altyd belangstellendes. Sy vertel dat die opnames van die nuwe album in haar huis by haar eie klavier gedoen is.

“Die stemme is in die Ou Meul­teater opgeneem, want die voëltjies en diere by my huis het te veel te­kere gegaan.”

En om te bevestig wat sy sê, trek ’n hond of wat los met ’n rumoer terwyl ons op die telefoon gesels.

Vir die nuwe album het sy verskeie musikante byeengebring wat ook saam met haar aan haar vorige albums gewerk het, onder andere Schalk Joubert. Ronan Skillen doen perkussie.

Stemme

Hallo, jy moet ingeteken wees of registreer om artikels te lees.