Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Musiek
Gheorghiu vier 1ste kwarteeu met album van musikale kleinkuns

Sou jy as sangliefhebber die loopbane van die mees inspirerende operasangers volg wat rondom die eeuwisseling gevestigde kunstenaars geword het, dan sal die naam van die Roemeense sopraan Angela Gheorghiu waarskynlik baie prominent uitstaan.

Sy het in die loop van 1994 ’n onvergeetlike internasionale debuut in La traviata by Covent Garden in Londen gemaak, met Georg Solti as dirigent. Dit is onnodig om die lofuitinge van selfs die grootste name onder die internasionale operajoernaliste en -kritici uit dié era aan te haal. Gheorghiu het selfs daarin geslaag om van die destydse beloftes oor ruim 25 jaar ver te oortref.

Haar klankboeket van 23 liedere deur 16 verskillende komponiste in agt tale op ’n CD getiteld Plaisir d’amour, is dan ook ’n viering van haar eerste kwarteeu. Dat sy ’n program van musikale kleinkuns gekies het, is veelbetekenend. Die (oor)bekendheid van die repertorium is ’n potensiële resep vir mislukking. Dit eis terloops minstens vier keer meer van die sanger om só ’n program voor te berei as ’n gemiddelde operarol.

Gheorghiu se voordrag word gekenmerk deur ’n intense temperament. Elke lied is emosioneel ewewigtig ontleed. Die gemoed van al die digters – merendeels ’n lys van bekende en soms selfs beroemde name – word raak getref en waar gepas, met sjarme voorgedra.

Dramatiese spanning, felheid, hartstog, liriese verrukking – alles word natuurlik deur hierdie bekoorlike stem ontgin. Dié program, hoe omvangryk en veelsydig ook al, is op ’n hoë musikale asook vokaal-tegniese intelligensievlak met volkome beheer uitgevoer.

In die drietal liedere van haar landgenote is Gheorghiu sonder gelyke. Die rypheid van haar teksbelewing slaan deur, al ken die luisteraar geen enkele woord in sommige van die tale nie. Vertalings van die gedigte help om elke nuanse van elke lied voluit te ervaar.

Tot nou toe was haar repertorium nooit wyd op die Franse of Duitse repertorium toegespits nie, al tel haar Carmen onder die heel bestes tot nog toe. In die Franse mélodies is daar soms ’n geringe gebrek aan erotiese subtiliteit. Haar Duits oortuig meer. Maar weer eens is dit hier duidelik: Italiaans bly vir ’n meerderheid sangers ’n geskenk . . . op ’n skinkbord.

Bykomende lof vir dié Plaisir d’amour-album kom ook Gheorghiu se landgenoot, die pianis Alexandra Dariescu, toe. Sy is méér as ’n begeleier. Sy word ’n volkome vennoot in die ekstroverte, ritmies passiegedrewe liedere, maar bring andersyds ook pragklanke voort in dié wat magiese kleursensitiwiteit vereis.

Plaisir d’amour. Liedere van Stephanescu, Debussy, Fauré, Rachmaninof, Paisiello, Bellini, Tosti, Rameau, Chopin, Martini, Hahn, R. Strauss, Balfe, Brediceanu, Villa-Lobos en Obradors. Angela Gheorghiu, sopraan / Alexandra Dariescu, klavier. Decca 483 4999.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.