Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Musiek
Gluck-opera verbeeld met gay karakters
Matthew Wild is die regisseur van Kaapstad Opera se produksie van Orphée et Eurydice. Foto: Argief

Die heteroseksuele hoofkarakters in die Duitser Christoph Gluck se opera Orphée et Eurydice gaan in ’n Kaapstad Opera-produksie deur twee gay titelkarakters vervang word.

Die opera, wat vir die eerste keer in 1762 met ’n Italiaanse libretto uitgevoer is, vertel die verhaal van ’n man (Orpheus) wat by sy vrou (Eurydice) se graf treur. Hy word ingelig dat hy in die onderwêreld met sy vrou herenig kan word, mits hy nooit na haar kyk nie. Hy stem in, maar verbreek eindelik die reël.

Die rol van Orpheus is oorspronklik vir ’n kastraatsanger geskryf – ’n man wat voor puberteit gekastreer is sodat hy as volwassene ’n hoë sopraan- of altstem kan behou. Oor die eeue heen is die rol egter vir kontratenore (mans) en mezzosoprane (vroue) aangepas, hoewel vroue in dié weergawes bloot die rol van ’n man vertolk het.

Matthew Wild, artistieke direkteur van Kaapstad Opera en regisseur van dié produksie, sê hulle voer dit nou nog ’n stappie verder.

“In ons weergawe sal Orpheus ’n vrou wees – al die hoofrolle (vrouekarakters) gaan deur vroue vertolk word,” sê hy. “Orpheus en Eurydice sal dus in ons produksie in ’n selfdegeslagverhouding wees.”

Wild sê die besluit is eintlik organies geneem danksy ’n Franse weergawe van die opera uit die 1850’s, waarin ’n mezzosopraan (’n vrou) die rol van Orpheus (’n man) kan vertolk.

“Mezzosoprane vertolk gereeld die rolle van mans in operas,” sê Wild. “Met twee vroue in die hoofrol, het ons gedink dis ’n goeie geleentheid om twee verliefde vroue uit te beeld – ook om die element van ’n vrouesanger wat maak asof sy iets is wat sy nie is nie (’n man), weg te neem.

“Dié stap gebeur verbasend min, maar mense is oop vir die idee: As jy klaar twee vroue in die hoofrolle het, hoekom kan hulle nie ’n verliefde paartjie in ’n selfdegeslagverhouding wees nie? Dié insluiting is belangrik.”

Wild sê die gay titelkarakters is nie die enigste verstellings wat in dié produksie aangebring is nie.

“Die stel gaan ook modern lyk – dit gaan nie tradisioneel wees soos dit oorspronklik uitgevoer is nie. Alles op die verhoog gaan op ’n onrealistiese, surrealistiese plek afspeel.”

Die res van die opera – die storielyn, die dansmusiek en veral die temas wat dit aanraak – sal behoue bly.

“Verlies en verdriet spreek tot almal. Almal ken iemand wat te vroeg van ons weggeneem is, so ons gaan gehore deur hierdie opera met verlies konfronteer in ’n omgewing wat baie peinsend sal wees.”

Benewens ’n operakoor, sluit die rolverdeling die mezzosopraan Fleur Barron (Orpheus), die sopraan Hlengiwe Mkhwanazi (Eurydice) en die sopraan Brittany Smith (Amor) in. Die dirigent Tim Murray gaan die produksie en die orkes lei.

  • Orphée et Eurydice word op 3, 5 en 7 September om 19:30 in die Baxter in Kaapstad uitgevoer. Die opera sal in Frans uitgevoer word met onderskrifte in Engels en Xhosa. Kaartjiepryse wissel tussen R180 en R280. Bespreek by Webtickets.
Meer oor:  Musiek  |  Opera  |  Orphée Et Eurydice  |  Kaapstad Opera
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.