Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Musiek
LUISTER: Kanadees sing Christa Steyn-liedjie in Frans

Hy praat of verstaan nie ’n woord Afrikaans nie – hy het nog nie eers ’n voet in Suid-Afrika gesit nie – maar dít het hom beslis nie gekeer om geheel en al deur die Christa Steyn-liedjie “Ek wil vir jou” oorrompel te word nie.

Só sê die Frans-Kanadese sanger Marc Devigne, wat Vrydag ’n Franse weergawe van die liedjie, “Je serai pour toi”, aanlyn uitgereik het.

Devigne, eens ’n Canadian Idol-finalis en semifinalis in die Frans-Kanadese weergawe van die talentsoekkompetisie The Voice, het dit boonop vir ’n goeie doel gedoen: Om geld vir die plaaslike Tribuo-fonds in te samel wat Suid-Afrikaanse kunstenaars weens die uitwerking van die Covid-19-pandemie steun.

Devigne vertel vanuit Toronto aan Netwerk24 dat ’n vriend van hom, Bennie Robinson, ’n bekende in die musiekbedryf, hom aan Afrikaanse musiek bekend gestel het. Hy het na heelwat Afrikaanse liedjies, onder meer Danie Niehaus se “Jy is vrou” en Laurika Rauch se “Kinders van die wind”, geluister voordat hy sy hart finaal op Steyn se 1988-liedjie verloor het.

“Ek dink die beeldskone melodie het my aanvanklik tot die liedjie aangetrek.

“Dit het my herinner aan Franse storievertel-liedjies, wat seker die rede is hoekom dit natuurlik gevoel het om die lirieke na Frans te vertaal. Ek kon dit in my kop hoor, hoe kragtig en hartroerend dit sou wees as ek dit met die regte verwerking sing.”

Devigne sê hy het na talle weergawes van die liedjie geluister – dit is aanvanklik deur Rauch opgeneem en Jannie du Toit en Tarryn Lamb het dit ook onder andere gesing – wat ’n bewys vir hom was dat die liedjie “tydloos” is.

Die lirieke is eers vir hom na Engels vertaal voordat hy self die Franse vertaling behartig het.

“Ek het die liriese inhoud en kern van die liedjie (in Frans) baie na aan die oorspronklike Afrikaanse lirieke gehou.

“Ek was nogal verbaas hoe moeiteloos dit was om grotendeels die betekenis van die lirieke in albei tale dieselfde te hou, terwyl dit steeds natuurlik en melodies klink. Dit is amper asof die liedjie ook bedoel was om in Frans gesing te word.”

Marc Devigne

Benewens die feit dat hy Steyn se musiek onder Franse luisteraars se aandag bring, sê hy hy is verheug om daarmee saam hande met die Tribuo-fonds te vat. Divigne is ook deur Robinson van die fonds én Suid-Afrikaanse kunstenaars se opdraande stryd weens die pandemie vertel.

“Kunstenaars wêreldwyd sal weet dat die afgelope jaar rampspoedig vir die bedryf was. Hoewel sommige plekke in die wêreld weer stadig op die been kom, sal die herstelproses in ander dele van die wêreld nog lank neem – ons moet dus voortgaan om die uitwerking van die pandemie teen te werk.

“Ek wil hê ‘Je serai pour toi’ en ‘Ek wil vir jou’ moet ’n soort temalied vir ’n veldtog wees om geld vir kunstenaars in te samel. Ek wil mense aanmoedig om ’n skenking aan die Tribuo-fonds te maak, of om bloot bewusmaking van die fonds te skep deur die liedjie met die hutswoorde #iwannabethereforyou en #ekwildaarweesvirjou te deel.

“Besoek asseblief www.tribuo.co.za as jy daartoe in staat is om ’n skenking te maak.”

  • Klik hier om die liedjie op Apple Music, Deezer, iTunes, Joox of Spotify te luister.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.