Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Teater
Duo wys hulle staal in Olimpiese ‘Waterworks’
Wessel Pretorius vertolk in die teaterstuk ‘The Waterworks Anthology’ onder andere ’n bul wat ’n stiervegter opdraand gee. Foto: Tiffany Schultz

The Waterworks Anthology

Courtyard Playhouse, Kaapstad

****

As verhoogkuns ’n Olimpiese sport was, was die dramaturg en akteur Wessel Pretorius beslis een van Suid-Afrika se sterkste aanspraakmakers op ’n goue medalje.

Pretorius het op die openingsaand van sy jongste werk, The Waterworks Anthology, in die splinternuwe Courtyard Playhouse in Kaapstad (weer) bewys hoekom hy een van ons beste woordtowenaars is. Daarmee saam het hy en die akteur David Viviers die staal van Olimpiese atlete in rolle getoon wat niks minder as fisiek vermoeiend is en vir iemand so onfiks soos ek plek-plek martelend lyk nie.

Die stuk is ’n Engelse vertaling én verwerking van die geprese toneelstuk Klara Maas se hart is gebreek, ensomeer: Die vloeistof trilogie, wat Pretorius en Viviers in 2016 by die KKNK ’n Kanna-prys vir beste debuutwerk besorg het.

Die oorspronklike stuk bestaan uit drie onafhanklike, skreeusnaakse en verbeeldingryke stories, wat elk ’n buitengewone hoofkarakter het: ’n traan, ’n druppel bloed en ’n spermsel.

Dié drie “helde” kry in The Waterworks Anthology ’n maat by – ’n druppel sweet – wat Pretorius in ’n nuwe vierde hoofstuk bekend stel.

Terwyl hy dié stories vertel, gee Viviers met tientalle – indien nie honderde nie – rekwisiete lewe aan byna elke selfstandige naamwoord en werkwoord wat Pretorius in sy vertelling sê. Asof dit nie moeilik genoeg is nie, doen hulle dit teen die spoed van lig, so asof ’n gehoorlid per ongeluk op ’n afstandbeheerder se fast forward-knoppie gaan sit het.

David Viviers: Foto: Tiffany Schultz
David Viviers. Foto: Tiffany Schultz

Daar is heelwat redes hoekom die Engelse verwerking opnuut lof verdien. Die eerste is die vertaling self, wat definitief nie net vinnig deur Google Translate geprosesseer is nie. Pretorius het moeite gedoen om die speelse en stoute Afrikaanse karakter van die oorspronklike stuk in die Engelse weergawe te behou.

Daarby verskaf die nuwe hoofstuk, waarin Pretorius die draak met sy eie lewe steek, die enigste werklik roerende oomblik, wat nodig was om selfs net vir ’n paar sekondes die komiese harwar te onderbreek. Dít kry veral gesoute TV-komedieskrywers nie altyd reg nie.

Die duo, maar veral Viviers, het ook nie vir ’n oomblik toegelaat dat die warboel van stories, bewegings, rekwisiete en verwysings – van De Sarasate tot Tsjaikofski en Disney-prinsesse tot Carly Simon – die vertoning laat ontspoor nie. Choreografie is eintlik hier tot in die fynste besonderheid met selfvertroue uitgevoer – en dit het gelyk asof nie ’n voet verkeerd gesit is nie.

Gehore wat ’n lang dag agter die rug het, nie werklik op en wakker in die teater is nie, of – soos een teaterganger – dit in die middel van die vertoning waag om die teater te verlaat en haarself in die proses te pletter val, gaan beslis stukkies van die vlietende storielyn misloop en heelwat vraagtekens hê.

Die eindproduk sal egter met dié gate steeds sy staande toejuiging verdien.

  • The Waterworks Anthology word tot 7 Februarie in die Courtyard Playhouse (die voormalige Alexander Bar-teaterrestaurant) in Kaapstad aangebied. Vertonings vind Woensdae tot Saterdae plaas en begin om 20:00. Kaartjies teen R180 is by http://courtyardplayhouse-ct.com beskikbaar of skakel 079 199 9078 tussen 10:00 en 20:00 (op Sondae tussen 12:00 en 18:00). Tydsduur: 90 min.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.