Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Vermaak
Van Rooyen tas na die siel van die perd
Die Namibiese skrywer Piet van Rooyen se vierde digbundel, Reisiger te perd, het onlangs verskyn. Vir inspirasie het hy veral by die groot Russiese skrywers gaan kers opsteek, skryf Rudolf Stehle.

Waarom het jy ’n bundel oor perde aangepak?

Ek is baie lief vir perde en ry al van kleinsaf perd.

My oupa was ’n perdeteler op die plaas Rondehoek in die Vrystaat en het tydens die Eerste Wêreldoorlog perde verskaf aan die regering. Hyself het my die eerste keer op ’n perd se rug getel.

Ek ry vandag nog perd (op 60) en is lid van die Namibiese uithouritspan.

Jou bundel is op meer as 400 boeke gegrond. Waarom het jy besluit om jou perd-gedigte op ander se tekste of idees te skoei?

Oral in die klassieke letterkunde duik perde op. Ek het met die leeswerk oor baie jare die idees oor perde kans gegun om op my te groei. Nie alle werke het sulke mooi verwysings na perde gehad nie. Ek het net daardie gebruik wat ’n gedig in die siel gehad het.

Watter klassieke werke waarin perde figureer, staan veral vir jou uit?

Die Russiese skrywers in die algemeen is “perde-mense”, en Rusland ’n plek vir perde. Dink maar aan die gejaag van die Kosakke oor die steppe.

Elke woord in hierdie sin praat perd. Dus is die Russiese skrywers vir my voor in die verstaan van die siel van die perd.

Ek praat dan hier veral van Leo Tolstoi, Iwan Toergenjef, Isaac Babel en Michail Sjolochof: die jagters, oorlogmakers en liefdemakers onder die Russe.

Vertel meer omtrent die kunswerk op die buiteblad.

Dis van Jahni Wasserfall en heet Somnio (Equus). Dis ’n nuwe kunswerk wat sy geskep het vir ’n uitstalling in April verlede jaar in Pretoria.

Wat tot my spreek, is veral die manier waarop perd en ruiter ’n byna ononderskeibare eenheid vorm, amper as ’n soort geesteswese, ’n Centaurus, ’n sterrebeeld.

Waaraan werk jy tans?

Ek het ’n roman-manuskrip wat tans van uitgewer na uitgewer swerf.

Dis oor ’n Europeër wat vir die gereg vlug en uitwyk na Afrika. Hier raak hy gaandeweg los van sy Europese wortels en raak in sy nuwe vaderland opgeslurp. Sy beendere bly uiteindelik hier agter.

Voor dié roman nie ’n tuiste gevind het nie, sal ek moeilik inspirasie kry vir ’n volgende een.

Stemme

Hallo, jy moet ingeteken wees of registreer om artikels te lees.