FOTO’S KAAPSE ARGIEF EN WIEBKE WILTING

Vroeër jare was daar baie meer spasie. Vandag staan die woonstelblokke en luukse hotelle so styf teen mekaar al langs dié smal stukkie kuslyn, dat daar skaars plek is vir ’n graspol.

Twee ywerige Duitse botaniste, dr. Friedrich Ludwig Liesching en sy vriend Johann de Ziegler, het in die laat 1700’s in Kaapstad aangekom en gesoek na ’n lappie grond waar hulle ’n botaniese tuin kon vestig.

Dié beskutte baaitjie met ’n varswaterfonteintjie teen die hange van Leeukop was ideaal. Hulle noem die baaitjie dan ook heel gepas Botaniebaai.

Dr. Liesching het gebly in die klein grasdakhuisie, The Knoll, heel regs op die foto. ’n Paar jaar later koop ’n Ier, ene O’Callaghan van die Cork-distrik, die grond en noem dit om een of ander onbekende rede Bantrybaai.

Die naam verdwyn vir ’n wyle, maar duik weer op in die 1920’s. Dit dra geen betekenis nie, maar bly egter in die volksmond. Die groot huis amper teenaan die water, Rock Cottage, is waar die onderwyser Robert Saunders en sy seun John gebly het.

Die storie word vertel dat hulle buurman, die regter William Menzies, een middag in sy swart gewaad afgedraf het rotse toe en die grootste rots plegtig Saunders Rock gedoop het.

Ná John se dood is die huis in ’n losieshuis omskep, daarna in ’n hotel en in 1961 is ’n woonstelgebou, Seacliffe, gebou wat vandag nog daar staan.

• Bronne: Under Lion’s Head deur Marischal Murray en The Lion Mountain deur Mona de Beer.

Hierdie artikel het oorspronklik in Weg # 19 (Mei 2006) verskyn. 

ONS SOEK JOU KIEKIES
Het jy mooi ou swart-wit foto’s wat die storie van toeka se toere, gesinsvakansies of avonture vertel? Of foto’s van hoe jou dorp destyds gelyk het? Stuur dit na suzaan.hall@media24.com, en jou foto verskyn dalk in die tydskrif.