Aan die begin van die 20ste eeu was die noordoostelike hoek van die Laeveld ’n wilde plek, só wild mense het dit Crook’s Corner genoem.

Grootwildjagters, stropers en werwingsagente vir mynwerkers het hier amok gemaak. 

Die naaste geregskantore was ver buite die park en vroeg in die 1930’s het die polisie besluit om ’n stasie in Punda Maria te vestig, toe die Krugerwildtuin se mees noordelike kamp. Die stasie is in die jare sewentig gesluit en parkpersoneel en navorsers het in die huis gebly. Dié polisieman se huis is onlangs opskep in ’n luukse selfsorghuis vir besoekers – Russell Cottage, met ’n donasie uit die boedel van natuurliefhebbers Roland en Ursula D’Ivry Russell.

Garth Holt, die kampbestuurder, en sy span het moeite gedoen om die geskiedenis van die polisiestasietjie te bewaar. Hulle het die oorspronklike vensterrame en deurkosyne van die polisiehuis gehou, en die meubels en dekor herinner aan ’n vervloë tyd. Die boma en braaiplek staan op die plek waar die aanklagkantoor was en ’n ou watertenk is nou ’n buitestort. 

Russell Cottage is teen die heuweltjie nes jy die ruskamp inry. Dis ’n entjie van die ander blyplekke en kampterrein af, en dus lekker privaat. 

Die verblyf is ten volle toegerus, met lugreëling, en slaapplek vir 4 mense in twee en suite-dubbelkamers. Die groot kuierstoep met sifdeure en -vensters het ’n uitsig oor die Pundavallei, net reg vir daai G&T ná ’n lang dag van voëlssoek langs die Luvuvhurivier.

Koste: Vanaf R2 285 per nag vir 4 mense.

Kontak: 012 428 9111; 013 735 6873; www.sanparks.org